पोखरा (लेखनाथ) । नागरिक परोपकार समन्वय संस्था पोखरा–३० ले कास्की जिल्लामा अति आवश्यक देखिएको शववाहन खरिदका लागि शुक्रबारबाट संहयोग संकलन अभियान थालेको छ ।

जिल्लाभित्र शव वाहनको अभावमा सर्वसाधारणहरुले दुख पाउने गरेको र कोरोना महामारीका कारण उक्त समस्या झनै जटिल बन्दै गएकोले शववाहन खरिद गर्नका लागि तत्काल अभियान थालिएको संस्थाका अध्यक्ष राजेन्द्र ओझाले जानकारी दिए ।

अभियानको पहिलो दिनमै ७ लाख रुपैंया संकलन भएको संस्थाका आर्थिक उपसमितिका संयोजक उपेन्द्र सुवेदी (राजु)ले जानकारी दिएका छन । अभियानमार्फत १ करोड रुपैंया संकलन गर्ने संस्थाको लक्ष्य रहेको छ । उक्त रकम मध्ये ४० लाख शववाहन गरिद गर्न खर्च गरिने र ६० लाख शववाहन सञ्चालनका लागि कोषको स्थापना गरिनेछ ।

पोखरा–३० शिशुवा आयोजित कार्यक्रममा संस्थाका अध्यक्ष राजेन्द्र ओझाले १ लाख ११ हजार ८ सय ८८, आर्थिक उपसमितिका संयोजक उपेन्द्र सुवेदी (राजु)ले आफ्ना माता पिताको नाममा १ लाख १ हजार ७ सय ६६, सचिव रामराज अधिकारीले ५१ हजार १ सय ११, मेग कन्सट्रक्सनको तर्फबाट सञ्चालक प्रेम बहादुर थापाले ५५ हजार पाँच रुपैंया र अन्य बिभिन्न समाजसेवी, संघ संस्थाका प्रतिनिधि र सर्वसाधारणहरुले गरी ७ लाख रुपैंया संकलन भएको हो ।

कार्यक्रममा वडा नं. ३० का वडा सदस्य सोमलाल कँडेल, नेकपा वडा नं. ३० का अध्यक्ष कृष्ण अधिकारी, नेपाली काँग्रेस वडा नं.३० का सभापति निरलाल तज्या, लेखनाथ उद्योग वाणिज्य संघका वरिष्ठ उपाध्यक्ष क्षत्रधर आत्रेय, लायन्स एडभाइजर बिनोद ढुङ्गाना लगायतले संस्थाको कार्यको सर्हाना गर्दै संघ संस्था, एवं सहयोगी हातहरूलाई आ-आफ्नो तर्फबाट सहयोग गर्न आग्रह गरेका छन् ।