पोखरा, ५ कार्तिक । ताङले लौसीबोट बहुउद्देश्यीय सहकारी संस्था पर्वत जिल्लालाई केन्द्र बनाएर गण्डकी प्रदेशमा नमुना सहकारी बनाउने योजनामा रहेको बताएको छ । शनिबार मोदी गाउँपालिका १ पर्वतमा भएको दोस्रो वार्षिक साधारण सभामा कृषि कार्यलाई प्राथमिकता दिँदै ल्याएको योजनाले अब्बल सहकारी बन्ने दावी गरिएको हो ।

सहकारीका अध्यक्ष क्याप्टेन मनबहादुर गुरुङको अध्यक्षतामा भएको सभा उद्घाटन गर्दै मोदी गाउँपालिकाका अध्यक्ष हिरादेवी शर्माले उत्साहजनक ढंगबाट सहकारी अघि वढेको बताइन् । बाँझो जमिनलाई उपयोग गरेर वैकल्पिक नगदेवालीको खेती गर्दै अघि बढ्न सुझाव दिईन् । उनले मोदी गाउँपालिकाको आन्तरिक आय बृद्धि गरेर सहकारीलाई थप सहयोग गर्ने बताइन् ।

सहकारीका सचिव जुक्तमान गुरुङले सञ्चालन गरेको सभामा कृषि ज्ञान केन्द्र पर्वतका प्रमुख मनिता थापाले नयाँ कार्ययोजनाले अघि बढेको लौसीबोट सहकारीको अभियानलाई ज्ञान केन्द्रको पूर्ण सहयोग हुने बताइन् । सरकारको नीति तथा योजनालाई तपाईहरु जस्तै अगुवा सोच भएकाहरुबाट पुरा हुने भन्दै प्राविधिक, आर्थिक तथा नीतिगत सहयोग दिन आफू तयार रहेको बताइन् ।

सहकारीले खेती सुरु गरेको अलैची र कागतीलाई कालो र पहँेलो सुनको संज्ञा दिँदै प्रमुख थापाले विरुवा रोप्नु सामान्य भएको बताइन् । उनले हेरचाह, गोडमेल र बजारीकरण मार्फत दोस्रो मुलुकमा निर्यात भएमात्र सहकारी सफल हुने ठोकुवा गरिन् ।

कृषि गर्ने क्षेत्र विस्तार, विरुवाको खाध्य तत्व, नर्सरी स्थापना, सिञ्चाई, रोग–किरा लगायत समस्या पहिचान गर्न पोखराबाट आएर खेतबारीको डिलमा बसेर हेरेर मात्र नहुने भन्दै कर्मचारी व्यवस्थापन र प्राविधिक पक्षलाई ध्यान दिन आग्रह गरिन् । गाउँपालिकाले कृषि क्षेत्रलाई उपेक्षा गरेकोमा चिन्ता गर्दै प्रमुख थापाले अनुदान खानमात्र पल्केकाले बाँझो जमीनको उपयोग गराएर देशको मुहार फेर्न नसक्ने बताइन् ।

१ लाख ५ हजार अलैची र १ हजार ५ सय कागतीका विरुवा रोपेर सुरु गरेको अभियानलाई मोदी गाउँपालिका वडा नं १ मा भएको सवै जमीनमा अभियान सञ्चालन गने सहकारीका अभियान्ता राम गुरुङको भनाई छ । उक्त क्षेत्रमा थप अनुसन्धान र माटो परीक्षण गराई चियाखेती तथा अन्य नगदेबाली लगाईने योजना रहेको राम गुरुङले बताए ।

वर्षिकोत्सवमा अध्यक्ष मनबहादुर गुरुङको नीति तथा योजना, सचिव जुक्तमान गुरुङको प्रतिवेदन र कोषाध्यक्ष गौ प्रसाद गुरुङको आर्थिक प्रतिवेदन पारित समेत गरेको छ । २ करोड सेयर पुँजी लक्ष्य बोकेको सहकारीले १ करोड वचत निक्षेप संकलन गर्ने जनाएको छ । करिव ३ सय जना सेयर सदस्य रहेको लौसीबोट सहकारीले यो आर्थिक वर्षमा ५ सय जना सेयर सदस्य पु¥याउने लक्ष्य रहेको कोषाध्यक्ष गौ प्रसादले जानकारी दिए ।

साधारण सभामा वडा अध्यक्ष टेकबहादुर गुरुङ, सहकारीका उपाध्यक्ष गिरमान गुरुङ, मेजर गुप्तमान गुरुङ, सल्लाहकार लोकबहादुर गुरुङ, लेखा समितिका संयोजक गंगाबहादुर गुरुङ, सहकारीका प्रबन्धक एवं सचिव जुक्तमान गुरुङ लगायतले पारदर्दीता, राजनीति, सेयर सदस्यबीच चल्ने हल्ला, विदेशमा रहेकालाई दिने जानकारी लगायत विषयमा बोलेका थिए । गाउँपालिका र कृषि ज्ञान केन्द्रको अनुदान समेत रहेको परियोजनामा बीमा समेत गरिएको जनाएको छ ।