लमजुङ । मनाङबाट अवैध रुपमा ल्याईएको ७० किलो जडिबुटिसहित पाँचजनालाई प्रहरीले पक्राउ गरेको छ । ग१ज ७४५३ नम्बरको पिकअपबोलेरो जीपलाई बेसीशहर नगरपालिका वडा नं. ८ नारायणस्थानमा चेकजाँच गर्ने क्रममा लुकाई छिपाई राखिएको अवस्थामा ती जुडिबुटिहरु भेटिएका हुन् ।

प्रहरीले चेकजाँच गर्ने क्रममा जटामसी १६ किलोग्राम, बुकीफुल एकसय २४ किलोग्राम, धुपिपात ५३ किलोग्राम, सुनपाती ९ किलोग्राम, भोजपत्र १३ किलोग्राम गरी दुईसय १५ किलोग्राम जडिबुटि फेला पारेको थियो । प्रहरीले जीप चालक लमजुङ दोर्दी गाउँपालिका वडा नं. ८ बस्ने वर्ष ३१ क कर्ण गुरुङ, जिपमा सवार भई जडिबुटी ओसारपसार गर्ने कार्यमा संलग्न मनाङ नार्फु गाउँपालिका वडा नं. २ बस्ने वर्ष ४५ का लाम्पा छिरिङ लामा र मनाङ नेस्याङ गाउँपालिका वडा नं. ३ वस्ने वर्ष २९ का पल्मु लामालाई पक्राउ गरिएको हो ।

त्यसैगरी अवैध जडिबुटी संकलन गरेको विशेष सूचनाको आधारमा सोही दिन राती ८ बजेको समयमा लमजुङ, वेसीशहर नगरपालिका वडा नं. ८ झयाङखेलास्थित दुईवटा घर खानतलासी गर्ने क्रममा अवैध जडिबुटि पक्राउ गरिएको छ । सो क्रममा वर्ष ४४ की शान्त कुमारी तामाङको घरमा प्रतिबन्धित जडिबुटी पाँचऔंले ८ किलोग्राम र सोही ठाउँ बस्ने वर्ष ४६ को मिनबहादुर तामाङको घरबाट अवैध जडिबुटी पाँचऔंले ३.५ किलोग्राम, निरमसी ५३ किलोग्राम, मजिठो १४ किलोग्राम, कुड्की ५४ किलोग्राम गरी चारसय ८२ किलोग्राम गरी १९ लाख ३२ हजार नौंसय ९० रुपैयाँ बराबरको सातसय ५ किलोग्राम अवैध जडिबुटी सहित मानिसलाई पक्राउ गरी डिभिजन बन कार्यालय लमजुङमा प्रहरीले पठाएको छ ।

लमजुङ वेसिशहर नगरपालिका वडा नं. ७ बस्ने वर्ष ३८ की सिद्धीमाया तामाङको घरमा प्रहरीले खानतलासी गर्दा २२ लाख ९९ हजार बराबरको ६ सय ९५ किलोग्राम अबैध जडिबुटी फेला पारी आवश्यक कारवाहीको लागि डिभिजन वन कार्यालय लमजुङमा पठाएको जिल्ला प्रहरी कार्यालय लमजुङले जानकारी दिएको छ ।