पोखरा, २५ भदौ । गण्डकी विश्वद्यिालयको डिनमा डा.कपिल अधिकारी नियुक्त भएका छन् । विश्वविद्यालयद्वारा डिन नियुक्तीका लागि उपकुलपति प्रा.डा.नवराज देवकोटा संयोजकत्वमा गठित समितीले डा.अधिकारीलाई डिनमा नियुक्त गरेको हो ।

डा. अधिकारीले नियुक्तीसँगै शुक्रबार पदबहाली समेत गरेको उपकुलपति देवकोटाले जनाएका छन् । डिन नियुक्त भएका डा.अधिकारीले अमेरिकाबाट भौतिक शास्त्र विषयमा विद्यावारिधी हासिल गरेका छन् ।

गण्डकी विश्वविद्यालयको स्थापनाको दुई वर्षको अवधिमा विश्वविद्यालयको कुलपति, उपकुलपति, रजिष्ट्रार, केही प्रध्यापक र कर्मचारी हुँदै साईन्स एण्ड टेक्नोलोजी (विज्ञान तथा प्रविधि संकाय)को डिन पदमा राष्ट्रिय प्रतिष्पर्धाबाट डा.अधिकारीलाई छनोट गरिएको उपकुलपति देवकोटाले जानकारी दिए ।
‘डा.अधिकारीको क्षमता र अध्ययनको अनुभवले गण्डकी विश्वविद्यालयलाई छुट्टै नेतृत्व प्रदान गर्नुका साथै पहिचान दिलाउन सक्ने विश्वास लिएको छु’,कुलपति देवकोटाले भने–‘गण्डकी विश्वविद्यालयलाई जुन सोंच र उद्देश्यका साथ स्थापना गरिएको छ, त्यसलाई सफल तुल्याउन हामी निरन्तर लागिरहने छौं ।’

गण्डकी विश्वविद्यालयले तीनवटा विषयमा आश्विन १७ गतेबाट अध्ययन–अध्यापन शुरु गर्ने भएको छ । विश्वविद्यालयले नेपालमा नै पहिलोपटक शुरु गरेको स्नातक तहमा खेलकुद व्यवस्थापन विषयको अध्ययन अध्यापन लेखनाथ भण्डारढिक स्थित नेपाल आदर्श माविमा शुरु गर्ने भएको छ । त्यसैगरी, बीफर्मा विषयको पोखरा–३२ स्थित ज्ञानकुञ्ज मावि र सूचना प्रविधि विषय महेन्द्रपुलबाट शुरु गर्ने जनाएको छ ।