पोखरा , ४ कात्तिक । पोखरा पर्यटन परिषद्ले आठ हजार मिटरभन्दा बढी उचाइका १४ वटा हिमाल सफल आरोहण गर्नुभएका तेजन गुरुङलाई एक समारोहबीच आज पोखरामा सम्मान गरेको छ ।

आरोही गुरुङलाई कार्यक्रमका प्रमुख अतिथि एवं पोखरा महानगरपालिकाका प्रमुख धनराज आचार्य, पोखरा पर्यटन परिषद्का अध्यक्ष तारानाथ पहारीले संयुक्त रुपमा सम्मान गर्नुभएको हो । कार्यक्रममा महानगरपालिकाका प्रमुख आचार्यले गण्डकी प्रदेशले पर्वतीय पर्यटनका धेरै सम्भावना बोकेको बताउनुभयो । आरोही गुरुङले हिमाल आरोहणमार्फत गर्नुभएको कीर्तिमानी पोखरासहित समग्र राष्ट्रकै लागि गौरवको विषय भएको उहाँले बताउनुभयो ।

पोखरा पर्यटन परिषद्का अध्यक्ष तारानाथ पहारीले पदयात्रा र पर्वतीय पर्यटनको विकासमा जोड दिँदै गण्डकी प्रदेशका हिमालहरूमा आरोहणको क्रम बढाउनुपर्ने आवश्यकता औँल्याउनुभयो । आरोहणका माध्यमबाट गुरुङले बनाउनुभएको कीर्तिमानी प्रशंसायोग्य भएको उल्लेख गर्दै उहाँले गुरुङले आगामी दिनमा पनि महत्वपूर्ण सफलता हासिल गर्ने विश्वास व्यक्त गर्नुभयो ।

आरोही गुरुङले विभिन्न समयमा आठ हजार मिटरभन्दा बढी उचाइका सगरमाथा, ल्होत्से, अन्नपूर्ण, मकालु, कञ्चनजङ्घा, नाङ्गा पर्वत, जि टू, जि वान, बोर्ड पिक, के टू, मनास्लु, धौलागिरि, चोयू र शिसापन्ज्म हिमालहरू आरोहण गर्नुभएको थियो ।

कार्यक्रममा पोखरा पर्यटन परिषद्का उपाध्यक्ष चौबहादुर गुरुङ, सचिव नारायण सुवेदी लगायतले गण्डकी प्रदेशमा पर्वतीय पर्यटनका विविध सम्भावनाबारे धारणा राख्नुभएको थियो ।