पोखरा, १६ भदौं । ट्रेकिङ एजेन्सिज् एसोसिएसन अफ नेपाल (टान), गण्डकी अध्यक्षमा कृष्णप्रसाद आचार्य निर्वाचित भएका छन् । टान गण्डकीको शनिबार ३१ औं वार्षिक साधारणसभा तथा १८ औं अधिवेशनले आचार्यको अध्यक्षतामा नयाँ कार्य समिति चयन गरेको हो ।

समितिको प्रथम उपाध्यक्षमा तीर्थराज सुवेदी, द्वितीय उपाध्यक्षमा मोहनप्रसाद सुवेदी, सचिवमा गोपालकृष्ण संग्रौला, सहसचिवमा भूपेन्द्रकुमार लामा र कोषाध्यक्ष दीपकप्रसाद सापकोटा चयन भए । कार्यसमिति सदस्यमा प्रकाश पौडेल, माधवप्रसाद खनाल, रेणुका कार्की, चन्द्रबहादुर भुजेल, बलराम दाहाल, भूपेन्द्र गौतम, श्रीकृष्ण तिमिल्सिना र अजयराज अधिकारी छन् ।

गण्डकी प्रदेशका प्रमुख डिल्लीराज भट्टले साधारणसभा उद्घाटन गर्दै नयाँ र वैकल्पिक पदमार्ग पहिचान र विकास गर्नुपर्ने आवश्यकतामाथि जोड दिए । ग्रामीण सडकको अवैज्ञानिक विकास विस्तारसँगै सदियौँदेखि सञ्चालनमा रहेका पदमार्गहरू विस्तारै लोप हुँदै गइरहेको अवस्थामा वैकल्पिक पदमार्ग आवश्यक रहने बताएका हुन् ।

पर्यटकको बसाइँ अवधि जति लम्ब्याइयो उति नै मुलुकलाई फाइदा हुने उनको भनाइ छ । ‘गण्डकी प्रदेशको राजधानी पोखरा मुलुककै पर्यटकीय राजधानी पनि हो । पोखरा पदयात्राको मूलद्वारका रुपमा लिइन्छ । नेपालको पर्यटन उद्योगको थालनी पर्वतारोहण र पदयात्राबाटै भएको हो,’ उनले भने, ‘यस प्रदेशमा दर्जनौं विश्वपरिचित पदमार्ग छन् । प्रख्यात अन्नपूर्ण पदमार्ग, मनासलु ट्रेक लगायतका पदमार्ग हाम्रा सम्पत्ति हुन् । जसलाई हामीले जोगाउनुपर्दछ ।’

माछापुच्छे मोडल ट्रेक, मिलिनियम ट्रेक, धौलागिरी आइसफल ट्रेक, हिडनलेक ट्रेक, कपुचे लेक ट्रेकसहित दर्जनभन्दा बढी पदयात्रा मार्गहरुको खोज तथा प्रवर्द्धन कार्य भएको जानकारी लिन पाउँदा खुशी लागेको बताउँदै उनले यसरी नै पदयात्रा क्षेत्रलाई व्यावसायिक र मर्यादित बनाउँदै आइपरेका चुनौतीहरुलाई सामना गरेर सरोकारवाला पक्ष अगाडि बढ्नुपर्ने उल्लेख गरे ।