पोखरा, ३१ जेठ । अमेरिकाको वासिङ्टन डीसी र क्यान्सस शहरमा आयोजना हुने युवा नेतृत्व कार्यक्रममा भाग लिन पोखराको मदरल्याण्ड माविका ४ विद्यार्थी त्यसतर्फ लागेका छन् । उनीहरुलाई बिहीबार गण्डकी प्रदेशकी प्रमुख सचिब लक्ष्मी कुमारी बस्नेतले अबिर र माला लगाएर विदाई गरेकी थिईन् ।

मदरल्याण्ड माविमा कक्षा १० मा अध्ययन कृपा बराल र एल्भिना बराल, कक्षा ११ व्यवस्थापनमा अध्ययरत सुबिज्ञा नेपाल र विज्ञान संकायमा अध्ययरत रबिना पौडेल जान लागेका हुन् ।

उनीहरु अमेरिकी दुतावास नेपालले सञ्चालन गरेको प्रतिष्पर्धामा उत्कृष्ट भई छनौट भएका थिए । नेपालभरबाट १६ जना छात्राहरु छनोट भएकोमा मदरल्याण्डबाट चारजना पर्न सफल भएका हुन् ।

विज्ञान, गणित, इन्जिनियरीङ र टेक्नोलोजीका बारेमा नेतृत्व सम्बन्धी तालिम लिने छन् । उनीहरुले महिलाको नेतृत्व, वातावरणीय विकास, खाद्य सुरक्षा, संस्कृतिका बारेमा समुदायमा बसेर सिक्ने छन् । उनीहरु नेपाल फर्किएपछि पनि आफ्नो परियोजना अनुसार समुदायमा नै काम गर्नेछन् ।

उनीहरुले २१ दिनसम्म अमेरिकामा रहेर अन्य देशका युवाहरूसँगै युवा नेतृत्व कार्यक्रममा सहभागिता जनाउने छन् । उनीहरु अमेरिकन सरकारको व्यवस्थापनमा देशकै प्रतिनिधित्व गरेर सहभागी जनाउन लागेका हुन् ।

विदाई कार्याक्रममा गण्डकी प्रदेशकी प्रमुख सचिब लक्ष्मी कुमारी बस्नेतले विद्यार्थीलाई पढाइ र सिकाई सँग-सँगै भए छिटो सिक्ने सक्ने बताईन् । उनले विद्यार्थीहरुले अमेरिकामा सिकेका कुरा विद्यालयमा आएर अन्य साथीहरुलाई पनि सिकाउँदा अझ फलदायी हुने बताईन् ।

कार्यक्रममा विद्यालयका प्रिन्सिपल नारायण बरालले विद्यालयले विद्यार्थीको चौतर्फीमा लागेको बताउदै त्यसै अनुसार नै विद्यार्थीहरु छनौट भएको बताए । उनले विद्यार्थीको सबै कुरामा विकासका लागि पढाईसँगैं खेलकुद, हाजिर जवाफ, अतिरिक्त क्रियाकलापहरु गराउँदैं आएको बताए ।