बागलुङ, ४ असोज । पार्टी टुक्रिए पछि माधवकुमार नेपाल नेतृत्वको नेकपा एकीकृत समाजवादीमा संलग्न भएका भन्दै १० नेतालाई नेकपा एमाले बागलुङले कारवाही गरेको छ । जिल्ला अध्यक्ष इन्द्रलाल सापकोटाको अध्यक्षतामा केन्द्रिय सचिव तथा गण्डकी प्रदेशका पुर्व मुख्य मन्त्री पृथ्वीसुब्बा गुरुङको प्रमुख अतिथ्यतामा बसेको बैठकको सो निर्णय गरेको हो ।

बैठकले विभाजनकारी गतिविधिमा संलग्न भएका जिल्ला कमिटीका सचिव लालबहादुर थापा, सदस्यहरु गोविन्द गौतम, भुपाल चालिसे, शान्ति अधिकारी, भरत पुरी, इन्द्र थापा, श्याम थापा, हरि घर्ती, चक्र थापा, जनप्रतिनिधि जीवन आचार्य र सिता छन्त्याललाई निष्कासन गर्दै पार्टीको अभिलेखबाट नाम हटाउने निर्णय गरेको जिल्ला अध्यक्ष इन्द्रलाल सापकोटाले जानकारी दिएका छन् ।

बैठकले असोज ५ गतेदेखि १२ गतेसम्म जिल्लाका दश वटै स्थानीय तहमा गाउँ केन्द्रित अभियान थाल्ने भएको छ । गाउँगाउँमा वडा कमिटी वैठक, भेला तथा अभिमुखिकरण कार्यक्रम गर्ने तयारी एमालेले गरेको छ ।

निसीखोलामा असोज ९ गते, ढोरपाटनमा ८ गते, तमानखोला ८ गते, बडिगाडमा असोज ९ गते, गलकोटमा असोज १२ गते, ताराखोला ९ गते, काठेखोलामा ५ गते, बागलुङ नगरपालिकामा असोज ९ गते, जैमिनीमा असोज ८ गते र बरेङ गाउँपालिकामा असोज ९ गते वैठक र कार्यक्रमको आयोजना गर्ने तयारी भएको अध्यक्ष सापकोटाले जानकारी दिए ।