पोखरा, ३१ भदौं । पोखरा महानगरपालिका नगर शिक्षा समितिले असोज १ गतेदेखि नियमित रुपमा विद्यालय सञ्चालन गर्न सूचना नै जारी गरेको छ । महानगरपालिका भित्रका सम्पूर्ण विद्यालयहरु, पूर्वप्राथमिक विद्यालयहरु, कोचिङ तथा ट्युसन सेन्टर र भाषा प्रशिक्षण केन्द्र लगायतका संस्थाहरु अब पूर्णरुपमा सञ्चालन हुन लागेका हुन् ।

नगर शिक्षा समितिले स्वास्थ्य सम्बन्धि मापदण्ड, विद्यालय सञ्चालन कार्यढाँचामा आधारित रहेर कार्ययोजना बनाई विद्यालय व्यवस्थापन समितिबाट अनुमोदन गरी एक प्रति शिक्षा महाशाखामा अनिवार्य रुपमा पेश गरी विद्यालय सञ्चालन गर्नुपर्ने जारी सूचनामा उल्लेख गरेको छ ।

विद्यालय सञ्चालन गर्नुपूर्व विद्यालयका कक्षाकोठा, फर्निचर, शौचालय, यातायातका साधन तथा विद्यालय प्राङ्गणलाई पूर्णरुपमा निर्मलीकरण गर्नुपर्ने, विद्यालयको भौतिक अवस्था, विद्यार्थी संख्याको आधारमा विद्यार्थीलाई एकै सिफ्ट वा फरक–फरक सिफ्ट बनाई कक्षा सञ्चालन गर्न सकिने, भौतिक दुरी कायम गर्दा सबै कक्षा काठा एउटै समयमा सञ्चालन गर्न सम्भव नभएमा फरक दिनमा फरक कक्षामा विद्यार्थीहरुलाई अध्यापन गर्न सकिने, विद्यार्थीलाई अनिवार्यरुपमा माक्सको प्रयोग, साबुन पानीले हात धुने व्यवस्था र कक्षाकोठा बाहिर सेनिटाईजर उपलब्धता अनिवार्य गराउने, तर प्रार्थना, खेलकुद लगायत अन्य भीडभाग हुने अतिरिक्त क्रियाकलाप सम्बन्धी कार्यक्रम सञ्चालन नगर्न सूचनामा प्रष्टसँग लेखिएको छ ।

पोखरा महानगरपालिका नगर शिक्षा समितिले जारी गरेको सूचना