News Portal

ताजा शिर्षकहरु

चर्चित शिर्षकहरु

प्रमुख समाचार राजनीति

एमसीसी पास नगर्न विप्लवको चेतावनी

राष्ट्रियतामाथि हमला भइरहेको भन्दै देशव्यापी आन्दोलनको घोषणा

पोखरा, २७ भदौं । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीले राष्ट्रियतामाथि हमला भइरहेको भन्दै आन्दोलनको घोषणा गरेको छ । शनिबार काठमाडौंमा पत्रकार सम्मेलन गर्दै एमसीसीको मुद्दा मुखरित भएर फेरि एकपटक नेपालको राष्ट्रियतामाथि हमला भइरहेको भन्दै देशव्यापी आन्दोलनको घोषणा गरेको हो ।

नेकपाका प्रवक्ता खड्गबहादुर विश्वकर्मा (प्रकाण्ड)ले सरकारले संसद् बोलाएर एमसीसी तत्काल पास गर्ने योजना बनाइरहेको आरोप पनि लगाएका छन् । प्रवक्ता प्रकाण्डले आफ्नो पार्टीले राष्ट्रिय र केन्द्रीकृत रूपमा नेतृत्व प्रदान गर्न एकहप्ते संघर्षको कार्यक्रम घोषणा गरेको बताउँदै भदौं २८ गते काठमाडौंमा बृहत् प्रदर्शन गर्ने जानकारी समेत दिए ।

प्रवक्ता प्रकाण्डले एमसीसी तीन–चार वर्षअघि सम्पन्न गर्ने उद्देश्यले अमेरिकी शासक वर्गले चलाएको कार्यक्रम भन्दै सरकारले एमसीसीजस्तो राष्ट्रघाती प्रोजेक्टलाई संसद्बाट पास गर्ने चलखेल गरिरहेको आरोप लगाएका छन् । सबै नेपाली नागरिक सम्झौताविरुद्ध आन्दोलित भइरहेको बेलामा विभिन्न प्रपञ्च रचेर सरकारले एमसीसी पास गर्न लागेको भन्दै प्रवक्ता प्रकाण्डले यो सम्झौता नेपाली जनता र नेपाल कम्युनिस्ट पार्टीलाई स्वीकार्य नहुने बताए ।

पत्रकार सम्मेलनमा प्रवक्ता प्रकाण्डले भने, ‘अहिले फेरि एकपटक हाम्रो राष्ट्रियतामाथि एउटा ठूलो हमला भइरहेको छ, एमसीसीको मुद्दा मुखरित भएर । आजको तीन–चार वर्षअगाडि यसलाई सम्पन्न गर्ने उद्देश्यका साथ अमेरिकी शासक वर्गले ल्याएको प्रोजेक्ट हो यो । त्यो वेला प्रधानमन्त्री शेरबहादुर देउवाकै सरकार थियो । नेपाली जनताले अहिलेसम्म त्यसको बिरोध गरिरहेका छन् । तर, पनि एमसीसी पास गर्न सरकारले विभिन्न प्रपञ्च रचिरहेको छ । यदि पास भएमा हाम्रो नेपाल कम्युनिस्ट पार्टी र नेपाली जनतालाई स्वीकार्य हुँदैन ।’

प्रतिक्रिया

डनन्यूज ट्रेन्डिङ