काठमाडौँ, २५ भदौं । प्रतिपक्ष दल नेकपा एमालेले आज प्रतिनिधि सभामा टेबल भाँच्नेदेखि लिएर माईक तानेर सभामुखलाई हान्ने प्रयास समेत गरेका थिए । प्रतिपक्ष एमालेका सांसद र मर्यादापालक बिचको घम्साघम्सीमा सरकार पक्षका सांसदहरु बस्ने टेबल नै भाँच्चिएको थियो भने एक महिला सांसदले माईकल तानेर सभामुखलाई हान्न खोज्दै थिईन् ।

सडकका रेलिङ्ग भत्काउने, तोडफोड गर्ने, सडकमा टायर बालेर अराजकता मच्चाउने काममा बदनाम एमालेका सांसदहरुले आज प्रतिनिधिसभा नै अराजकताको पराकाष्ठा देखाएका थिए । जसमा नेकपा एमालेकी सांसद रेखा झाले आज सभामुखको टाउको फुटाउने योजना भएको सञ्चारमाध्यममा खुलेआम बताएकी थिईन् ।

एमाले सांसद झाले प्रतिनिधि सभाको आजको बैठकपछि सञ्चारकर्मीलाई प्रतिक्रिया दिनेक्रममा यस्तो कुराको खुलासा गरेकी हुन् । ‘आज टाउको नै फुटाउँथेँ सभामुखलाई हान्न माइक तानेको । संसद्को मर्यादा छ नि । विरोध भइरहेको छ । हामी नारा लगाइरहेका छौँ बैठक चलाउने ?’ आक्रोशित हुँदै सांसद झाले भनिन्, ‘नियम उल्लंघन गर्नेलाई के गर्ने ? अहिले हानेको छैन मौका मिल्यो भने हान्छौँ ।’

सांसद झाले गृहमन्त्री बालकृष्ण खाँणको टेबुलको माइक झिकेर सभामुख बसेको रोस्ट्रमतर्फ हान्न खोजेकी थिइन् । उनले एमालेले कारबाही गरेका १४ सांसदलाई पदमुक्त नगरेको भन्दै सभामुखको भूमिकामाथि प्रश्न गरिन् ।