पोखरा । गण्डकी प्रदेशमा कोरोना संक्रमणका कारण चारजनाको मृत्यु भएको छ । यस प्रदेशमा हालसम्म मृत्यु हुनेको संख्या ६३ पुगेको स्वास्थ्य निर्देशनालय गण्डकी प्रदेशका निर्देशक एवम् गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा.विनोद विन्दु शर्माले जानकारी दिएका छन् ।

कोरोना संक्रमणका कारण मृत्यु हुनेहरुमा पोखरा महानगरपालिका वडा नं. १५ का ५२ बर्षीय कोरोना संक्रमित महिला, पोखरा महानगरपालिका वडा नं. १ का ४२ बर्षीय कोरोना संक्रमित पुरुष, पोखरा महानगरपालिका वडा नं. २२ का ६८ बर्षीय पुरुष र पोखरा महानगरपालिका वडा नं. ३१ का ५८ बर्षीय पुरुषको मृत्यु भएको स्वास्थ्य निर्देशनालय गण्डकी प्रदेशले जानकारी दिएको छ । पोखरा–१५ का ५२ बर्षीय कोरोना संक्रमित महिलाको हिजो राती १० बजेर २० मिनेट जाँदा पोखरा स्वास्थ्य विज्ञान प्रतिष्ठान, पोखराको आईसियुमा उपचारका क्रममा मृत्यु भएको हो । उनलाई कोरोना संक्रमणको पुष्टि भएपछि हिजो नै अस्पतालमा भर्ना गरिएको थियो ।

आज विहान ६ः१५ बजे स्वास्थ्य निर्देशनालयले जारी गरेको विज्ञप्ति अनुसार पोखरा–१ का ४२ बर्षीय कोरोना संक्रमित पुरुषको कार्तिक ७ गते बेलुका ७ः४५ बजे चरक मेमोरियल अस्पताल, पोखरामा उपचारका क्रममा निधन भएको हो । असोज ३० गते न्यूमोनियाको समस्याका कारण भर्ना गरिएको उनको कार्तिक ३ गते कोरोना संक्रमण पुष्टि भएको थियो ।

पोखरा–२२ का ६८ बर्षीय कोरोना संक्रमित पुरुषको हिजो बिहान ०९ः३० बजे गण्डकी मेडिकल कलेज, पोखरामा उपचारका क्रममा निधन भएको छ । कोभिड–१९ सहित न्यूमोनियाको समस्या रहेको उनलाई कार्तिक ६ गते कोरोना संक्रमण पुष्टि भएको थियो । लगत्तै कार्तिक ७ गते नै उनलाई उपचारका लागि अस्पताल भर्ना गरिएको थियो ।

पोखरा–३१ का ५८ बर्षीय कोरोना संक्रमित पुरुषको हिजो दिउँसो ४ः२५ बजे पोखरा स्वास्थ्य बिज्ञान प्रतिष्ठान, पोखराको आईसियुमा उपचारका क्रममा निधन भएको हो । कोभिड–१९ सहित न्यूमोनिया, हाईपरटेन्सन र मधुमेहको समस्या रहेको उनलाई कार्तिक ७ गते कोरोना संक्रमणको पुष्टि भएको थियो । सोही दिन नैं उपचारका लागि भर्ना गरिएको उनको भोलिपल्ट मृत्यु भएको हो । कोरोना संक्रमणका कारण मृत्यु भएका सबै व्यक्तिहरुको शबको ब्यबस्थापन भईसकेको स्वास्थ्य निर्देशनालय गण्डकी प्रदेशले जानकारी दिएको छ ।