गोरखा । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी निकट विद्यार्थी संगठन अखिल (क्रान्तिकारी) गोरखाले एमसीसी सम्झौंता नगर्न माग गर्दै सरकारका विरुद्धमा आज शुक्रबार विरोध प्रदर्शन गरेको छ ।

एमसीसी कुनै पनि हालतमा पारित गर्न नहुने भन्दै अखिल (क्रान्तिकारी)ले गोरखाको बसपार्कदेखि हरमटारी बजारसम्म ‘राष्ट्रघाती एमसीसी सम्झौंता खारेज गर’भन्ने मूल नारासहित विरोध प्रदर्शन गरेको हो ।

विरोध प्रदर्शन पश्चात् आयोजित कोणसभालाई सम्बोधन गर्दै अखिल (क्रान्तिकारी) गोरखा जिल्लाका अध्यक्ष गगन परियारले भने–‘कुनै पनि हालतमा एमसीसी सम्झौता पास हुन दिदैनौं । यो दलाल संसदीय व्यवस्थाका मतियारहरुले राष्ट्रघाती एमसीसी सम्झौंता पारित गर्न खोजेमा त्यसका विरुद्धमा हामी कडा संघर्षमा उत्रिने छौं ।’

अध्यक्ष परियारले कोरोना संक्रमणको महामारीका कारण आमजनताको जनजीविकामा नराम्रो असर पु¥याएको भन्दै यसतर्फ राज्य गम्भीर बन्न नसकेकोमा खेद प्रकट गरे । साथै उनले महामारीको यो समयमा आमजनता र विद्यार्थीहरुलाई तत्कालै कोरोना खोपको व्यवस्था गर्न माग गरे ।

कार्यक्रममा अखिल (क्रान्तिकारी) गोरखा जिल्लाका सचिव खिम गुरुङले सिङ्गो देश नै दलालहरुको हातमा पुगिसकेकोले यसलाई चिरेर अघि बढ्न नयाँ ढंगबाट विद्यार्थी आन्दोलन अघि बढाउनु पर्ने आवश्यकता देखिएको धारणा व्यक्त गरे ।