पोखरा । गण्डकी प्रदेश सरकारले आगामी आर्थिक वर्ष २०७७/०७८ को नीति तथा कार्यक्रम प्रस्तुत गरेको छ । बजेट असार १ गते ल्याउनै पर्ने बाध्यकारी व्यवस्था भएका कारणले नीति तथा कार्यक्रम आजै प्रस्तुत गरिएको हो ।

मुख्यमन्त्री कृष्णचन्द्र पोखरेल नेपाली नेतृत्वको सरकारले ल्याएको नीति तथा कार्यक्रम गण्डकी प्रदेश प्रमुख सीताकुमारी पौडेलले आज सार्वजनिक गरेकी हुन् । बजेटको प्राथमिकता र सिद्धान्त भने यसअघि नै निवर्तमान अर्थमन्त्री किरण गुरुङले संसदमा प्रस्तुत गरिसकेका थिए ।

प्रदेश सरकारले आज ल्याएको नीति तथा कार्यक्रममा स्वास्थ्य, पर्यटन, कृषि र पूर्वाधार निर्माणलाई प्राथमिकतामा राखिएका छ । प्रदेशका सबै नागरिकलाई कोरोना विरूद्वको खोप लगाउने, कोरोना संक्रमितको उपचार प्रभावकारी बनाउने, कोभिडका कारण सिर्जित समस्या समाधानमा पहल गर्ने र कोभिडका कारण बाबुआमा गुमाएका बालबालिका र आफन्त गुमाएका परिवारलाई नगद राहतको व्यवस्था गर्ने लगायतका विषयहरु समेटिएको छ ।

प्रदेश प्रमुख पौडेलले प्रदेश सरकारले तयार पारेको नीति तथा कार्यक्रम प्रदेशसभामा पेश गर्दै कोभिड नियन्त्रण, विभिन्न पूर्वाधार निर्माण, प्रदेशका विभिन्न जिल्लास्थित रहेका अस्पतालहरूको विशिष्टिकरण, विश्वविद्यालय निर्माण लगायतका कार्यक्रम रहेको सार्वजनिक गरिन् ।

यस अघि, नवगठित सरकारको पहिलोपटक बसेको बैठक भने विवादित हुन पुग्यो । पूर्वमुख्यमन्त्रीको सेवा र सुविधालाई लिएर सरकार आलोचित भए पछि सरकारका प्रवक्ता कुमार खड्काले पूर्वमुख्यमन्त्रीको सेवा र सुविधा थपेर खर्च बढाउन लागिएको नभई कानुन बनाएर व्यवस्थित गर्न लागिएको प्रतिक्रिया दिएका छन् ।