“यस अघि पनि प्रधानमन्त्री ओलीले पुस ५ गते संसद विघटन गरेका थिए । तर तीन महिनापछि फागुन ११ गते सर्वोच्च अदालतले प्रधानमन्त्री ओलीको त्यस निर्णयलाई उल्टाई दिएको थियो । तर यसपटक राष्ट्रपतिसँग मिलेमलोमा संविधानको प्रक्रिया पुर्याएर संसद विघटन गरिएको छ । जसले गर्दा अब संसद पुनर्स्थापना असम्भव जस्तै छ ।”

काठमाडौं । राष्ट्रपति विद्यादेवी भण्डारीले संसद भंग गर्दै दुई चरणमा निर्वाचन मिति घोषणा गरेकी छिन् । नेकपा एमालेका अध्यक्ष खड्गप्रसाद ओली र विपक्षी गठबन्धनका तर्फबाट शेरबहादुर देउवाले प्रस्तुत गरेका दुवै प्रस्ताव खारेज भएसँगै मन्त्रिपरिषद् बैठकको सिफारिसमा राष्ट्रपतिले दुई चरणमा चुनाव घोषणा गरेकी हुन् ।

प्रस्ताव खारेज भएसँगै शुक्रबार मध्यरातमा बसेको मन्त्रिपरिषद बैठकले संविधानको धारा ७६–५ अनुसार सरकार गठन हुन नसकेपछि धारा ७६–७ अनुसार निर्णय गर्न राष्ट्रपतिसमक्ष सिफारिस गर्ने निर्णय गरेको थियो । मन्त्रिपरिषदले संसद भङ्ग र नयाँ निर्वाचन मितिको घोषणा गर्न सिफारिस गरेको एक घन्टाभित्रै राष्ट्रपति कार्यालयले राति १ बजेर ५० मिनेटमा संसद भंग र नयाँ निर्वाचन मितिको घोषणासहित विज्ञप्ति जारी गरेको थियो । मध्यरातमा बसेको मन्त्रिपरिषद् बैठकले कात्तिक २६ र मंसिर ३ गते गरी दुई चरणमा चुनाव सिफारिस गरेको थियो । त्यही आधारमा राष्ट्रपतिले मिति तोकेकी हुन् ।

यस अघि पनि प्रधानमन्त्री ओलीले पुस ५ गते संसद विघटन गरेका थिए । तर तीन महिनापछि फागुन ११ गते सर्वोच्च अदालतले प्रधानमन्त्री ओलीको त्यस निर्णयलाई उल्टाइदिएको थियो । तर यसपटक राष्ट्रपतिसँग मिलेमलोमा संविधानको प्रक्रिया पुर्याएर संसद विघटन गरिएको छ । जसले गर्दा अब संसद पुनर्स्थापना असम्भव जस्तै छ ।

“सम्माननीय राष्ट्रपति विद्यादेवी भण्डारीज्यूबाट नेपालको संविधानको धारा ७६ को उपधारा (७) बमोजिम वर्तमान प्रतिनिधि सभा विघटन गर्न र अर्को प्रतिनिधि सभाको पहिलो चरणको निर्वाचन संवत् २०७८ साल कार्तिक २६ गते शुक्रबार र दोस्रो चरणको निर्वाचन संवत् २०७८ साल मङ्सीर ३ गते शुक्रबार सम्पन्न गर्नेगरी निर्वाचनको मिति तोक्न नेपाल सरकार, मन्त्रिपरिषद्बाट मिति २०७८/२/८ मा निर्णय भै सोही बमोजिम सम्माननीय प्रधानमन्त्रीज्यूबाट सिफारिस भएकोले उक्त सिफारिस बमोजिम वर्तमान् प्रतिनिधि सभा विघटन गरी अर्को प्रतिनिधि सभाको पहिलो चरणको निर्वाचन संवत् २०७८ साल कार्तिक २६ गते शुक्रबार र दोस्रो चरणको निर्वाचन संवत् २०७८ साल मङ्सीर ३ गते शुक्रबार सम्पन्न गर्नेगरी निर्वाचनको मिति तोक्नु भएको छ,” राष्ट्रपति कार्यालयले अबेर राति जारी गरेको सूचनामा भनिएको छ ।