News Portal

ताजा शिर्षकहरु

चर्चित शिर्षकहरु

सम्पादकीय

कांग्रेस सभापति देउवाले माफी माग्नुपर्छ !

'आफताब आलमलाई छुटाउन प्रयास गर्ने सार्वजनिक अभिव्यक्ति'

यस अघि प्रजातन्त्र दिवसका दिन राष्ट्रपति विद्यादेवी भण्डारीले कारागारमा रहेका बन्दीहरुलाई आममाफी दिने क्रममा हत्यामा संलग्न र फरार अपराधीहरुलाई समेत छुट दिएपछि यसको सर्वत्र विरोध भएको थियो ।

नेपाली कांग्रेसका सभापति शेरबहादुर देउवाले राजपुर बमकाण्डमा घाईते भएका व्यक्तिलाई जिउँदै ईट्टाभट्टामा जलाउने पूर्वमन्त्री एवम् सांसद आफताब आलमलाई छुटाउन सक्दो प्रयास गरिरहेको अभिव्यक्ति सार्वजनिक गरेका छन् । बमकाण्डमा पक्राउ परेका आफताबलाई भोलि परिस्थिति बदल्न पनि सक्छ, तपाईहरु धैर्य गरेर बस्नुहोला भन्दै कार्यकर्तालाई दिएको आश्वासनले पीडित पक्ष र अदालतमा कस्तो प्रभाव पार्छ भन्ने विषयमा अलिकति हेक्का हुनुपर्छ कि पर्दैन ? ‘म आफ्नो तर्फबाट आफ्नै किसिमले छुटाउन लागिरहन्छु । तपाईहरु धैर्य गर्नुस् । भोलि परिस्थिति बदल्न पनि सक्छ । त्यसैले तपाईहरु धैर्य गरेर बस्नुहोला । अदालतमा मुद्दा चलिरहेको छ ।’ भनेर रौतहतको गढीमाई नगरपालिकास्थित धरमपुर सिंगारवनमा विष्णु पुराण महायज्ञको बुधबार उद्घाटन गर्दै सभापति देउवाले सार्वजनिक रुपमा नै आलमको रिहाईको लागि पहल गर्ने अभिव्यक्ति दिएका हुन् । घाईतेहरुलाई जिउँदै ईट्टाभट्टामा लगेर पोल्ने क्रुर र अमानवीय अपराध गरेका व्यक्तिका विषयमा यस्तो परिस्थितिमा कांग्रेसका सभापति देउवाले दिएको मन्तव्यले आमनागरिकमा निराशा छाएको छ । सो महायज्ञमा एकसय पाँच किलोको माला लगाएका कांग्रेस सभापति देउवाले दिएको मन्तव्यले पीडित र न्यायप्रेमी जनताको छातीमाथि एकहजार किलोको फुलले थिचेभन्दा बढि पिडा दिएको छ ।

घटनाका मुख्य योजनाकार मानिएका पूर्वमन्त्री एवम् काँग्रेस सांसद आलम यतिबेला पुर्पक्षका लागि थुनामा छन् । २०६४ चैत २७ गते राजपुरस्थित शेख इद्रिसको गोठघरमा बम बिष्फोट भएको थियो । राजनीतिक पहुँच, शक्ति, गुण्डागर्दी र डरत्रासका कारण जिउँदै घाईतेलाई लगेर ईटाभट्टामा डढाउँदा समेत प्रहरी प्रशासनले आलमलाई केही गर्न सकेको थिएन । राजपुर बमकाण्डको १२ वर्षपछि २०७६ असोज २६ गते बल्ल प्रहरीले आलमलाई पक्राउ गरेको थियो । रौतहट कारगारबाट काठमाडौंको नख्खु कारगारमा सारिएका आलम लगायत बमकाण्डमा संलग्न अन्य व्यक्तिहरुलाई पनि प्रहरीले पक्राउ गरेको छ । घटनाका साक्षीहरुलाई समेत डर र त्रास देखाएर बयान फेर्न लगाउने पात्र आलमलाई नै पूर्वप्रधानमन्त्री तथा नेपाली काँग्रेसका सभापति देउवाले बचाउन गरेको प्रयासले आमनागरिकमा चिन्ता थपेको छ । यस अघि प्रजातन्त्र दिवसका दिन राष्ट्रपति विद्यादेवी भण्डारीले कारागारमा रहेका बन्दीहरुलाई आममाफी दिने क्रममा हत्यामा संलग्न र फरार अपराधीहरुलाई समेत छुट दिएपछि यसको सर्वत्र विरोध भएको थियो ।

जघन्य अपराधमा संलग्न हुनेहरुलाई राजनीतिक आवरणमा जोगाउँदै र छुटाउँदै जाने हो भने कानुनी राज्यको के अर्थ रह्यो र ? यतिबेला देशमा सत्तारुढ नेकपा आफ्नै दलभित्रको किचलोको कारण संकटग्रस्त अवस्थामा पुगेको छ । दुई तिहाईको सरकार आफ्नै पार्टीको किचलोमा परेर थिलथिलो बनिरहेको छ । कुन बेला सरकार ढल्ने हो कुनै ठेगान नै छैन । सरकार परिवर्तनको लागि खेल चलिरहेको बेलामा यतिबेला सरकार बनाउने र ढाल्ने निर्णायक शक्ति नेपाली कांग्रेस बन्न पुगेको छ । त्यस्तो पार्टीका सभापतिले जघन्य अपराधमा अदालतमा मुद्दा चलिरहेको विषयमा दिएको मन्तव्यले ठुलो अर्थ राख्दछ । सभापति देउवाको अभिव्यक्तिले सिधै पीडितहरु र न्यायालयलाई धम्क्याउने काम भएको छ । अपराधलाई आफ्नो दलको वा विचारको भयो भन्दैमा यसरी नै जोगाउँदै जाने हो भने आमनागरिकहरुले सुरक्षा र शान्तिको आशा यो राज्य र सरकारबाट कसरी गर्ने ? त्यसैले रौतहटमा अभिव्यक्त गरिएको यो भनाईका विषयमा नेपाली कांग्रेसका सभापति देउवाले माफी माग्नैपर्छ ।

प्रतिक्रिया