News Portal

ताजा शिर्षकहरु

चर्चित शिर्षकहरु

डन न्यूज खोज प्रमुख समाचार

सशस्त्र प्रहरीको विद्यालयको अनियमिततामा डिआइजी दिग्विजय पनि अख्तियारको छानबिनमा

काठमाडौं, ४ मंसिर । सशस्त्र प्रहरी बलको कीर्तिपुरस्थित विद्यालयमा करिब ११ करोड रुपैयाँ हिनामिना भएको प्रकरणमा अख्तियार दुरुपयोग अनुसन्धान आयोगले उच्चपदस्थ अधिकारीसम्मलाई छानबिनको दायरामा ल्याएको छ। इन्स्पेक्टर कल्पना गुरुङ र उनका साथी लीलाबहादुर लामा पक्राउ परेपछि अहिले डिआइजी तहसम्मका अधिकारी अख्तियारको बयानमा तानिएका छन्।

सशस्त्र प्रहरीको कीर्तिपुरस्थित विद्यालयमा भएको ठूलो आर्थिक अनियमितता प्रकरणमा अख्तियारले उच्च तहसम्म अनुसन्धान विस्तार गरेको छ। अनियमितता हुँदा विद्यालयका समादेशक रहेका हालका डिआइजी दिग्विजय सुवेदीलाई समेत आयोगले छानबिनको दायरामा ल्याएको छ। अख्तियारले छानबिन अघि बढाएपछि सशस्त्र प्रहरी प्रधान कार्यालयले सुवेदीलाई बाहिनीपतिको जिम्मेवारीबाट हटाएको छ। उनी कैलालीस्थित बाहिनीमा कार्यरत थिए।

अख्तियारले यस प्रकरणमा एक दर्जनभन्दा बढीको बयान लिइसकेको छ। सुरुमा सशस्त्र प्रहरीको कल्याण शाखाले जिल्ला प्रहरी परिसर काठमाडौंमा जाहेरी दिएको थियो। सोही जाहेरीका आधारमा गत २० असारमा प्रहरीले इन्स्पेक्टर गुरुङ र लीलाबहादुर लामालाई पक्राउ गरेको थियो। भ्रष्टाचार मुद्दा आकर्षित हुने निचोडसँगै १० दिनपछि दुवैलाई अख्तियारमा बुझाइएको थियो।

दुई महिना अख्तियारकै हिरासतमा राखेर अनुसन्धान गरेपछि उनीहरूलाई साढे १३ करोड धरौटीमा रिहा गरिएको स्रोत बताउँछ। रिहा भएपछि लामा भने ठगीसम्बन्धी अर्को मुद्दामा प्रहरीकै हिरासतमा छन्। गुरुङ र लामामाथि अख्तियारको अनुसन्धान अझै जारी छ।

इन्स्पेक्टर गुरुङले करिब ६ वर्ष विद्यालयको लेखा अधिकृत भएर काम गरेकी थिइन्। विद्यालयको आम्दानी कल्याण कोषमा जम्मा गर्नुपर्नेमा उनले गैरकानुनी रूपमा रकम निकालेर साथी लामालाई दिँदै आएकी थिइन्। कतिपय रकम कनेक्ट आइपिएसबाट लामाको कम्पनीको खातामा स्थानान्तरण गरिएको छ। स्कुलको कमान्डेटको नम्बर भन्दै लामाकै नम्बर बैंकलाई दिएर उनले झुक्याएकी थिइन्।

सशस्त्र प्रहरीले आन्तरिक छानबिन पनि गरेको थियो। डिआइजी युवराज अर्यालको नेतृत्वमा गठित समितिले इन्स्पेक्टरकै योजनामा हिनामिना भएको निष्कर्ष निकालेको थियो। सुरुमा पैसा फिर्ता गर्ने मौका दिए पनि फिर्ता गर्न नसकेपछि कानुनी प्रक्रिया अघि बढेको हो। यस प्रकरणमा विद्यालयका तत्कालीन कमान्डेन्टहरू सुवेदीसहित भूपेन्द्र केसी र रामजंग पाण्डे पनि छानबिनमा छन्। कल्याण शाखाका अधिकारीको भूमिका पनि शंकास्पद देखिएको छ। अख्तियारको अनुसन्धान अन्तिम चरणमा पुगेको स्रोत बताउँछ।

यसैबीच, लगिबिचौलिया इनम सापकोटासँग साँठगाँठको आरोपमा सेवाबाट हटाइएका सशस्त्र प्रहरीका तत्कालीन एआईजी वंशीराज दाहालले कारबाही पुनरावलोकनका लागि निवेदन दिएका छन्। उनले गृह मन्त्रालय हुँदै मन्त्रिपरिषद्मा पुनरावेदन निवेदन दिएका हुन्। गत २३ असोजमा गृहमन्त्रीस्तरीय निर्णयबाट उनलाई सेवाबाट हटाइएको थियो। सशस्त्र प्रहरी नियमावलीको दफा ११३ (ग) अनुसार आचरणसम्बन्धी नियम बारम्बार उल्लंघन गरेको अभियोग लगाइएको थियो। हाल हिरासतमा रहेका सापकोटालाई सुरक्षासम्बन्धी संवेदनशील सूचना ह्वाट्सएपमा पठाएको खुलेपछि दाहाललाई कारबाही गरिएको हो। उनको पुनरावेदनउपर निर्णय भने अझै भइसकेको छैन।

डनन्यूज ट्रेन्डिङ