पोखरा । नेत्रविक्रम चन्द ‘विप्लव’ नेतृत्वको प्रतिबन्धित नेपाल कम्युनिष्ट पार्टी कास्की र अखिल क्रान्तिकारीले आफ्ना नेता तथा कार्यकर्ताको गैरन्यायिक गिरफ्तारीको विरोध गर्दै भित्ते लेखन तथा कोणसभाको आयोजना गरेको छ ।

केन्द्रीय कार्यक्रम अनुसार नेकपा कास्कीले जिल्लाव्यापी रुपमा भित्तेलेखन कार्यक्रम सञ्चालन गरेको कास्कीका इन्चार्ज पूर्णजित पुनले जानकारी दिनुभयो । नेकपाका केन्द्रीय सचिवालय सदस्य तथा विदेश विभाग प्रमुख धमेन्द्र बास्तोला ‘कञ्चन’ लगायत नेता तथा कार्यकर्ताको गैरन्यायिक गिरफ्तारीको विरुद्धमा भित्ते लेखन तथा विरोध प्रदर्शन गरिएको इन्चार्ज पुनले बताउनुभयो ।

‘एकीकृत जनक्रान्ति–जिन्दावाद’, ‘दलाल संसदीय व्यवस्था खारेज गरौँ’, ‘वैज्ञानिक समाजवादी व्यवस्था स्थापना गरौँ’, ‘सम्पूर्ण राजवन्दी रिहाई गर’, ‘सामाजिक फासीवादी केपि सरकार मुर्दावाद’ जस्ता नाराहरु भित्तेलेखनमा लेखिएको छ ।

त्यसैगरी, प्रतिबन्धित नेकपाको भातृ संगठन अखिल क्रान्तिकारी कास्कीले आफ्ना नेता तथा कार्यकर्ताको गैरन्यायिक गिरफ्तारीको भत्र्सना गर्दै विरोध सभाहरुको आयोजना गरेको छ । पछिल्लो चरणमा अखिल क्रान्तिकारीले सिद्ध माध्यमिक विद्यालय पोखरामा विद्यार्थीहरु सहभागी गराई विरोध प्रदर्शन कार्यक्रमको आयोजना गरेको विद्यार्थी नेता प्रकाश बास्तोला ‘मार्शल’ले जानकारी दिनुभयो ।