पोखरा, ७ जेठ । पोखराको फेवातालमा पौडी खेल्ने क्रममा डुबेर एक युवकको मृत्यु भएको छ। बुधबारदेखि तालमा हराइरहेका काँहूखोला निवासी २७ वर्षीय रिवाज गुरुङ बिहीबार बिहान मृत अवस्थामा फेला परेका हुन्।

बुधबार युवक हराएको सूचना पाउनासाथ सशस्त्र प्रहरी बल नेपाल नं. २४ गण कालिका पोखराबाट सशस्त्र प्रहरी सहायक निरीक्षक अमृत क्षेत्रीको नेतृत्वमा १३ सदस्यीय उद्धार टोली परिचालन गरिएको थियो। उक्त टोलीमा विशेषज्ञ गोताखोर तथा विपद् व्यवस्थापन विज्ञहरू समेत सहभागी थिए।

सशस्त्र प्रहरीको गोताखोर टोलीले रातभर खोजी कार्य जारी राखेको थियो। अथक प्रयासपछि बिहीबार बिहान करिब ३ः३५ बजे गुरुङलाई फेवातालबाट अचेत अवस्थामा बाहिर निकालिएको थियो।

उद्धार लगत्तै उनलाई उपचारका लागि पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पताल पुर्‍याइएको थियो। अस्पताल पुर्‍याए लगत्तै चिकित्सकहरूले उनलाई जाँच गरी मृत घोषणा गरेका थिए। घटनाको सम्बन्धमा प्रहरीले थप अनुसन्धान अगाडि बढाएको जनाएको छ।