स्याङ्जा, १५ वैशाख । स्याङ्जा प्रहरीले प्रतिबन्धित लागूऔषध कारोबारमा संलग्न दुई जनालाई नियन्त्रणमा लिएको छ। जिल्ला प्रहरी कार्यालय स्याङ्जाबाट खटिएको विशेष टोलीले गोप्य सूचनाका आधारमा उनीहरूलाई पक्राउ गरेको हो।

गएको वैशाख १३ गते दिउँसो करिब सवा १ बजे पुतलीबजार नगरपालिका वडा नम्बर १, ट्याक्सी चोकस्थित फारुक अलीको घरमा लागूऔषधको कारोबार भइरहेको भन्ने खबर पाएपछि प्रहरीले छापा मारेको थियो। सो क्रममा ट्याक्सी चोक बस्ने ४० वर्षीय फारुक अली र पुतलीबजार ४ घर भई हाल वडा नम्बर १ अभियानपथ बस्ने २७ वर्षीय निशान थापालाई प्रहरीले नियन्त्रणमा लिएको हो।

प्रहरीले उनीहरूको साथबाट बुप्रेनर्फिन इन्जेक्सन ४ थान, फेनार्गन ४ थान र डायजेपाम इन्जेक्सन ४ थान गरी कुल १२ थान लागूऔषध बरामद गरेको छ। पक्राउ परेका दुवै जनामाथि लागूऔषध सम्बन्धी कसूरमा थप अनुसन्धान गर्नका लागि स्याङ्जा जिल्ला अदालतबाट १० दिनको म्याद थप गरी कानुनी प्रक्रिया अगाडि बढाइएको जिल्ला प्रहरी कार्यालय स्याङ्जाका सूचना अधिकारी एवं प्रहरी नायव उपरीक्षक प्रसन्न राज चौधरीले जानकारी दिएका छन् ।