पोखरा, १३ वैशाख । कास्की प्रहरीले पोखरा महानगरपालिकाबाट ठूलो परिमाणको प्रतिबन्धित लागू औषध ब्राउन सुगर (खैरो हेरोइन) सहित एक महिलालाई पक्राउ गरेको छ।

जिल्ला प्रहरी कार्यालय कास्की र लागू औषध नियन्त्रण व्यूरो शाखा कार्यालय पोखराको संयुक्त टोलीले पोखरा–११ फूलवारी, भानुमार्गबाट २७ वर्षीया मन्दिरा मगरलाई नियन्त्रणमा लिएको हो।

फूलवारी क्षेत्रमा लागू औषधको अवैध बिक्री वितरण भइरहेको भन्ने विशेष सूचनाको आधारमा खटिएको प्रहरी टोलीले बिहीबार अपराह्न करिब ३ः०० बजे मगरको डेरामा छापा मारेको थियो। खानतलासीका क्रममा प्रहरीले ब्राउन सुगरः १०२.३७ ग्राम (डिजिटल तराजुमा तौल गर्दा), नगद ९ लाख रुपैयाँ, डिजिटल तराजु १ थान र मोबाइल १ थान बरामद गरेको थियो ।
पक्राउ परेकी मगरको स्थायी घर लमजुङ जिल्लाको मध्य नेपाल नगरपालिका वडा नं. ६ रहेको प्रहरीले जनाएको छ। उनी हाल पोखरा–११ फूलवारीमा डेरा गरी बस्दै आएकी थिइन्।

जिल्ला प्रहरी कार्यालय कास्कीका सूचना अधिकारी प्रहरी निरीक्षक गणेश पाण्डेका अनुसार, बरामद लागू औषध र नगदसहित मगरलाई नियन्त्रणमा लिएर थप अनुसन्धान प्रक्रिया अगाडि बढाइएको छ। उनलाई लागू औषध नियन्त्रण ऐन अन्तर्गत मुद्दा चलाईएको सूचना अधिकारी पाण्डेले जानकारी दिए ।