लमजुङ, १३ चैत । लमजुङ जिल्लाको मध्यनेपाल नगरपालिका–५ समिभञ्ज्याङमा चैते दशैंको अवसरमा प्रथम खुला हाफ अल्ट्रा म्याराथन सम्पन्न भएको छ ।

विगत २५ वर्षदेखि सक्रिय कायापलट असल शासन क्लबको आयोजनामा भएको उक्त दौडको उद्घाटन मध्यनेपाल नगरपालिकाका मेयर रमेश पाण्डेले रिबन काटेर गरेका थिए । मेयर पाण्डेले मध्यनेपाल ऐतिहासिक र धार्मिक महत्त्व बोकेको ठाउँ भएको बताउँदै यस्ता खेलकुद कार्यक्रमले क्षेत्रको प्रचारप्रसारमा ठूलो सहयोग पुग्ने बताए ।

इशानेश्वर महादेव मन्दिर प्राङ्गण (वडा नं. ७ करापुटार)बाट सुरु भएको दौड वडा नं. ६ भोर्लेटार हुँदै समिभञ्ज्याङका विभिन्न बस्तीहरू पार गर्दै तान्द्राङकोट नागभैरव थानमा पुगेर समापन भएको थियो । निर्धारित २१ किलोमिटरको दूरी पार गर्न देशका विभिन्न भागबाट ८० जना धावकहरू सहभागी थिए ।

दौडमा गोरखाका निरज भट्ट क्षत्रीले १ घण्टा ३२ मिनेट ४८ सेकेन्डको समयमा पहिलो स्थान हासिल गर्दै नगद ४० हजार रुपैयाँ, ट्रफी, मेडल र प्रमाणपत्र प्राप्त गरे । रामेछापका श्याम लामा भोटेले १ घण्टा ३४ मिनेट २८ सेकेन्डमा दोस्रो स्थान हासिल गर्दै नगद २५ हजार रुपैयाँसहित ट्रफी, मेडल र प्रमाणपत्र जिते भने स्याङ्जाका धनु मानन्धरले १ घण्टा ३४ मिनेट ५४ सेकेन्डमा तेस्रो भएर नगद १५ हजार रुपैयाँ, ट्रफी, मेडल र प्रमाणपत्र प्राप्त गरे ।

त्यसैगरी तनहुँका सनम गुरुङ, रामेछापका अमित राई, सोलुखुम्बुका मिलन कुलुङ, भोजपुरका उमेश विष्ट, तनहुँका आदित्य जीसी र नवलपुरका रिखुलाल सिञ्जालीले सान्त्वना पुरस्कारस्वरूप नगद ३ हजार रुपैयाँ, मेडल र प्रमाणपत्र प्राप्त गरे ।

पुरस्कार वितरण तथा समापन समारोह क्लबका अध्यक्ष बाबुराम मल्लको अध्यक्षतामा सम्पन्न भयो । कार्यक्रमका प्रमुख अतिथि वडा नं. ५ का वडाध्यक्ष ओम वीर गुरुङ रहेका थिए । तान्द्राङकोट पैदल मार्ग पर्यटन विकास समितिका अध्यक्ष मेमबहादुर गुरुङले तान्द्राङकोटको ऐतिहासिक तथा धार्मिक महत्त्वबारे प्रकाश पारेका थिए ।

वडाध्यक्ष गुरुङले समुद्री सतहबाट करिब १५ सय मिटर उचाइमा रहेको यो क्षेत्र बिस्तारै आन्तरिक तथा बाह्य पर्यटकको रोजाइमा पर्न थालेको बताए । कार्यक्रममा रेफ्री विश्वास केसी र सञ्जित काफ्लेलाई सम्मान गरिएको थियो । व्यास नगरपालिका–५ का अध्यक्ष हिमाल श्रेष्ठ, स्थानीय समाजसेवी देवप्रसाद श्रेष्ठलगायतले पनि मन्तव्य राखेका थिए । कार्यक्रमको सञ्चालन क्लबका सचिव इभन जोशीले गरेका थिए ।