पोखरा, २२ कार्तिक । नेपालको पर्यटन प्रवर्द्धनका लागि निरन्तर खटिँदै आएको ‘डुलुवा’ टोलीले शुक्रबार पोखराबाट हुम्लातर्फ साहसिक यात्रा सुरु गरेको छ । २१ सदस्यीय टोलीले पर्वत, बाग्लुङ, रुकुमकोट, राकम, सर्खेघाट, सिमकोट, लिमी उपत्यका र ५,००० मिटर उचाइको लाप्चा ला पास पार गर्दै मंसिर १ गते पोखरा फर्किने योजना बनाएको छ ।

पोखरामा आयोजित विशेष विदाई कार्यक्रममा पोखरा भ्रमण वर्ष २०२५ का संयोजक गोपीबहादुर भट्टराईले टोलीलाई सुखद यात्राको शुभकामना दिँदै बिदाई गरे । सोही अवसरमा डुलुवा संयोजक योगेश भट्टराईले पोखरा भ्रमण वर्षको आधिकारिक व्यानर हस्तान्तरण गरेका थिए । रेवान पोखराका पूर्वअध्यक्ष नरेश भट्टराईलगायतले पनि टोलीलाई शुभकामना दिए ।

संयोजक भट्टराईले भने, “नेपाल प्राकृतिक रूपले नै साहसिक पर्यटनको अनुपम गन्तव्य हो । डुलुवाको यो यात्राले पोखरा र गण्डकी प्रदेशको पर्यटन प्रवद्र्धनमा ठूलो योगदान पुग्नेछ । भ्रमण वर्षका क्रममा हामीले देश–विदेशमा विभिन्न कार्यक्रम गर्दैछौँ, यो अभियानले त्यसलाई थप बल पुग्ने छ ।”

डुलुवा संयोजक योगेश भट्टराईले अभियानको उद्देश्य प्रष्ट्याउँदै भने, “हुम्ला नेपालको अन्तिम उपत्यका हो । यो यात्रा अत्यन्त रोमान्चक र चुनौतीपूर्ण हुनेछ । हामी कैलाश पर्वत र लिमी उपत्यकासम्म पुग्ने प्राचीन बाटोलाई पुनर्जीवित गर्दैछौँ । नेपालको प्राकृतिक र सांस्कृतिक सुन्दरता विश्वसामु उजागर गर्नु हाम्रो मुख्य लक्ष्य हो ।”

डुलुवाको परिचय र कीर्तिमान
पोखराका पर्यटनकर्मी युवाहरूको समूह ‘डुलुवा’ सन् २००८ देखि प्याराग्लाइडिङ र पर्यटन व्यवसायमा संलग्न रहँदै नेपाल भ्रमणमा सक्रिय छ । सन् २०२० मा औपचारिक रूपमा ‘डुलुवा’ नामकरण भएको यो समूहले स्थापनाको १५ वर्षमा नेपालका ७० जिल्ला घुमिसकेको छ । भारतको लद्दाखदेखि कास्की–कन्याकुमारीसम्मको सफल यात्रासमेत गरिसकेको छ ।

यसपटकको रुट
हुम्ला अन्तिम उपत्यका अभियानअन्तर्गत टोलीले रुकुमकोट → राकम → सर्खेघाट → सिमकोट → लिमी उपत्यका → लाप्चा ला पास → सिमकोट फर्किने र त्यसपछि सर्खेघाट–कोहलपुर–बुटवल हुँदै ११ दिनमा पोखरा फर्किने योजना छ ।

पछिल्लो उपलब्धि
यात्राकै क्रममा डुलुवा समूहले बनाएको ‘वी विल राइज फाउन्डेसन’ र नेपाल टेलिभिजनद्वारा संयुक्त रूपमा आयोजित भिडियो प्रतियोगितामा समूहले दुई ठूला अवार्ड जितेको छ । ‘दि नर्दर्न वाल’ले उत्कृष्ट भिडियोको उपाधि र ‘मेरो गाउँ तक्सेरा’ले ‘मोस्ट एनरजेटिक भिडियो मेकर’ अवार्ड प्राप्त गरेको छ ।

पोखरा भ्रमण वर्ष २०२५ लाई सार्थक बनाउन र नेपालको दुर्गम हिमाली भेगको सुन्दरता विश्वसामु चिनाउन ‘डुलुवा’ टोली फेरि एकपटक साहसिक कदमसहित अघि बढेको छ ।