पोखरा, ३१ जेठ । लोभमा फस्दा पोखराका एक व्यवसायी आफैं ठगिएका छन् । ती व्यवसायीलाई नक्कली सुनको माला दिदैं चार लाख रुपैयाँ ठगी गरेर फरार भएका दुई भारतीय नागरिकलाई ३ घण्टा भित्रमा प्रहरीले बुधबार पक्राउ गर्न सफल भएको छ ।

सिर्जनाचोकमा प्लास्टिक पसल सञ्चालन गरेर बसेका ५२ वर्षीय व्यवसायीलाई सुनको माला भन्दै उक्त नक्कली गहना चार लाख रुपैयाँमा बिक्री गरेर फरार भएका उनीहरुलाई छोरेपाटनबाट प्रहरीले दिउँसो ४ बजे पक्राउ गरेको थियो । प्रहरीले उनीहरुको साथबाट ३ लाख ९० हजार रुपैयाँ बरामद गरेको छ ।

पक्राउ पर्नेमा भारतको उत्तरप्रदेश घर भएकी ७१ वर्षीया प्रभा देवी र ४२ वर्षीय रामनारायण सुलेङी रहेका छन् । बुधबार दिउँसो १ः४५ बजे दुईजनाले ती व्यवसायीलाई उक्त धातु सुन भनेर नैं बिक्री गरेका थिए । व्यवसायीले आफूले खरिद गरेको सुन पसलमा परीक्षण गर्दा सुन नभएको पत्ता लागेपछि आफू ठगिएको थाहा पाएका थिए । लोभका कारण आफू नराम्रोसँग फसेपछि उनले तत्कालै प्रहरीलाई गुहारेका थिए ।

ती व्यवसायीले उपलब्ध गराएको हुलिएका आधारमा वडा प्रहरी कार्यालय बैदाम र छोरेपाटन प्रहरी चौकीबाट खटिएको प्रहरी टोलीले दिउँसो ४ बजे पोखराबाट बुटवलतर्फ जाँदै गरेको माइक्रो बसमा चेकजाँच गर्दा ती दुईजनालाई पक्राउ गर्न सफल भएको हो ।

पक्राउ परेका दुईजनालाई ठगी, आपराधिक विश्वासघात तथा आपराधिक लाभ सम्बन्धी कसुरमा बिहीबार कास्की जिल्ला अदालतबाट ७ दिन म्याद थप गरी अनुसन्धानका लागि वडा प्रहरी कार्यालय बैदाममा राखिएको जिल्ला प्रहरी कार्यालय कास्कीले प्रेषित गरेको ईमेलमा लेखिएको छ ।