पोखरा, ११ फागुन । गैरकानुनी रुपमा अन्तर्राष्ट्रिय आगमन कल वाईपास (भिओआईपि) सञ्चालन गर्ने दुईजनालाई केन्द्रीय अनुसन्धान व्यूरो र जिल्ला प्रहरी कार्यालय कास्कीको संयुक्त टोलीले आज शुक्रबार पक्राउ गरेको छ ।

रुपन्देही लुम्विनी सांस्कृति नगरपालिका वडा नं. ४ स्थायी घर भई हाल पोखरा–११ फुलबारी बस्ने वर्ष २७ को ईमरान अहमद र पर्सा जिल्ला हाल सखुवापर्सौनी गाउँपालिका वडा नं. ५ स्थायी घर भई हाल पोखरा–११ फुलबारी बस्ने वर्ष ३७ को विशाल साह कलवारलाई १२८ पोर्ट क्षमताको डिभाइसमा सिमकार्ड प्रयोग गरी कल वाईपास गरी रहेको अवस्थामा अवैध भीओआईपिसहित पक्राउ गरेको हो ।

प्रहरीले ६४ पोर्ट भएको अवैध कल वाईपास गर्ने उपकरण गेटवे थान १ र सो उपकरणमा जडान भएको सिमहरु ६४ थान र सोको चार्जर, वल्र्ड लिंकको राउटर, युपिएस, एक्सटेन्सन कार्ड, नेट फाईवर, पेन ड्राइभ, मोवाईल, चेकबुक, एनसेलका सिमकार्डहरु बरामद गरेको छ ।