पोखरा । रक्सीको नसामा चुरोट हराएको निहुँमा झैझगडा हुँदा आफ्नै साथीको हत्या गरेर फरार भएका प्रेम भनिने नन्दलाल श्रेष्ठलाई जिल्ला प्रहरी कार्यालय कास्कीले पक्राउ गर्न सफल भएको छ । सिन्धुली सुनकोशी गाउँपालिका–१ निवासी २३ वर्षीय नन्दलाल श्रेष्ठलाई प्रहरीले तनहुँ आँबुखैरेनी नगरपालिका वडा नं. २ माक्र्यु सडक खण्डमा रिक्सामा काठमाडौं जाँदै गर्दा पक्राउ गरी प्रहरीले आज सार्वजनिक गरेको हो ।

पोखरा महानरपालिका वडा नं. ६ स्थिति बसुन्धरापार्कमा बसी कवाडीको सामानहरु उठाउने काम गर्ने अन्दाजी २४/२५ वर्षका कृष्ण चौधरीलाई टाउकोमा ढुङ्गाले हिर्काएर प्रेमले गम्भिर घाईते बनाएका थिए । तत्कालै वडा प्रहरी कार्यालय बैदामबाट प्रहरी नायव उपरीक्षक (डिएसपी) यादव ढकालको कमाण्डमा खटिएको टोलीले घाईतेको उपचारको लागि पश्चिमाञ्चल क्षेत्रीय अस्पताल पठाएको थियो । तर उपचारका क्रममा चौधरीको मृत्यु भएको प्रहरी नायब उपरीक्षक तथा प्रवक्ता सुवास हमालले जानकारी दिएका छन् ।

गत असोज महिनाको पहिलो हप्तामा सिन्धुली जिल्ला सुनकोशी गाउँपालिका वडा नं. २ कुशेश्वर दुम्जा घर भएका २३ वर्षीय नन्दलाल श्रेष्ठ रिक्सासहित काम गर्नका लागि पोखरा आएका थिए । पोखरामा आई लेकसाईड, बसुन्धरापार्क, पृथ्वीचोकसहित विभिन्न स्थानबाट कवाडी संकलन गरी बेच्ने काम गर्दै आईरहेको कास्की प्रहरीले जानकारी दिएको छ ।

सोही क्रममा कार्तिक २२ गते दिउँसो अन्दाजी ४ बजेको समयमा पोखरा वडा नं. ६ बसुन्धरापार्कमा दाङ जिल्ला घोराई घर बताउने अन्दाजी २४÷२५ वर्षका कृष्ण चौधरीसँग भेट भईसँगै बस्दै आएका थिए । सोही दिन साँझ अन्दाजी ७ बजेको समयमा चौधरी र श्रेष्ठ सँगै बसी सौफी नामको रक्सी मिलेर खाएका थिए । चौधरीले मेरो श्रीमतीले खाना पकाएको छ, सँगै खानाखान जाउँ भनी दुवैजना बसुन्धरा पार्कमा रहेको प्रतिक्षालयमा गईसँगै खाना खाएका थिए । सोही समयमा चौधरीकी श्रीमतीले चुरोट हरायो भनेपछि चौधरीले किन चोरेको भनेर नन्दलालको पेटमा समाउँदा उल्टै नन्दलालले धकेली परसम्म पु¥याएका थिए । त्यसपछि चौधरीले आगो बाल्ने चुलोको ढुङ्गा समाती नन्दलाललाई हिर्काउन खोज्दा उल्टै नन्दलाले ढुङ्गा खोसेर चौधरीको टाउकोमा तीनपटकसम्म हिर्काएर गम्भिर घाईते बनाई भागेको कास्की प्रहरीले दिएको विवरणमा उल्लेख छ । तत्कालै पुगेको वडा प्रहरी कार्यालय बैदामको टोलीले नन्दलालको हुलियाका आधारमा तत्कालै खोजतलासका लागि परिपत्र गरेको थियो ।