पोखरा, ५ भदौं । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीको कास्की जिल्ला संगठनको सेक्रेटरीमा सहिद पुत्र प्रकाश बास्तोला ‘मार्शल’ चयन भएका छन् ।

विद्यार्थी फाँटबाट उदाएका क्रान्तिकारी नेता प्रकाश ‘मार्शल’लाई आज बसेको नेकपा पश्चिम गण्डक ब्यूरोको बैठकले नयाँ जिम्मेवारी सुम्पिएको हो । यस अघि नेता मार्शल नेकपा केन्द्रीय प्रतिनिधि समिति सदस्य तथा विद्यार्थी जिल्ला संगठन समिति कास्कीको सेक्रेटरीको भूमिकामा कार्यरत थिए । पार्टीको पोखरा महानगर कमिटीको सेक्रेटरी हुँदैं पार्टीका महासचिव नेत्रविक्रम चन्द विप्लवको निजी सचिवालयदेखि केन्द्रीय कार्यालयमा समेत कार्यरत थिए ।

जनयुद्धका बेलामा सेनाद्वारा बुबाको हत्या भएपछि कक्षा ७ मा अध्ययनरत रहँदैं देखि लक्ष्मी आदर्श मावि, लेखनाथ शिशुवाको इकाई अध्यक्ष हुँदैं माओवादी आन्दोलनमा होमिएका युवा नेता प्रकाश ‘मार्शल’ कास्कीका विद्यार्थीमाझ लोकप्रिय पात्र हुन् । उनी शैक्षिकदेखि मेडिकल माफियाहरुसँगको संघर्षमा धेरैपटक प्रहरी हिरासतमा बसेका छन् ।

पार्टी प्रतिबन्धित अवस्थामा रहँदा ज्यान जोखिममा राखेर नेता मार्शलले धेरै कार्यक्रमहरु सफलतापूर्वक सम्पन्न गरेका थिए । निडर, हक्की अनि क्रान्तिकारी स्वभावका युवा नेता प्रकाश ‘मार्शल’को माऊ पार्टीमा सेक्रेटरीको भूमिकामा आएपछि कास्कीमा रहेका पीडित गरिब, किसान र असहायहरुमा आशाको किरण छाएको छ ।