पोखरा, २८ कार्तिक । राष्ट्रिय वाणिज्य बैंक लिमिटेड पृथ्वीचोक र विरौंटा शाखाबाट नक्कली सुन धितो राखेर लाखौं रुपैयाँ ठगि गर्ने व्यक्तिलाई जिल्ला प्रहरी कार्यालय कास्कीले पक्राउ गरेको छ ।

पर्वत कुश्मा नगरपालिका वडा नं. ३ स्थायी घर भई हाल पोखरा महानगरपालिका वडा नं. १८ सराङकोट बस्ने २५ बर्षीय अभिसेक सुनारलाई पक्राउ गरिएको प्रहरी प्रमुख एसपी अजय केसीले जानकारी दिए । प्रमुख एसपी केसीका अनुसार सुनारले विभिन्न मितिमा नक्कली सुनका गरगहनाहरु राष्ट्रिय वाणिज्य बैंकमा राखि कर्जा लिएको र लामो समयसम्म ब्याज र साँवा बुझाउन नआएपछि शंका लागेर चेक जाँच गर्दा यो रहस्य खुलेको हो ।

सुनारले बिरौंटामा रहेको राष्ट्रिय वाणिज्य बैंकबाट १६ लाख ६० हजार र पृथ्वीचोकमा रहेको शाखाबाट ७ लाख ४५ हजार गरी २४ लाख पाँचहजार रुपैयाँ कर्जा लिएका थिए । अनुसन्धानका क्रममा नेपाल सुनचाँदी व्यवसायी संघ कास्कीमा पठाएर ती गरगहनाहरु चेकजाँच गर्दा नक्कली सुनबाट तयार पारिएको भन्ने परीक्षण प्रतिवेदन प्राप्त भएको कास्की प्रहरीले जानकारी दिएको छ ।

पक्राउ परेका सुनारलाई कास्की जिल्ला अदालतबाट ठगी, आपराधिक विश्वासघात तथा आपराधिक लाभ (एक्सटर्सन) सम्बन्धी कसुरमा पाँचदिन म्याद थप गरी प्रहरीले अनुसन्धान प्रकृया अगाडि बढाएको छ ।