रोल्पा, ३१ वैशाख । पार्टी नै विभाजित पारेर चुनावमा होमिएको नेत्र विक्रम चन्द ‘विप्लव’ नेतृत्वको नेकपासहित नेपाली कांग्रेस र नेकपा एमाले गठबन्धनको संयुक्त उम्मेदवारलाई हराउँदै थवाङ गाउँपालिका वडा नं. ५ मा नेकपा माओवादी केन्द्रको प्यानल नै विजयी भएको छ ।

काँग्रेस एमाले र विप्लव समुह सहितका संयूक्त उम्मेदवार बनेका काँग्रेसका लुकमन रोकामगरलाई हराउँदै माओवादी केन्द्रका गोवर्द्धन घर्तीको प्यानल नैं विजयी भएको हो । काँग्रेस, एमाले र विप्लव समुहका रोकामगरले दुईसय ९१ मत ल्याउँदा माओवादीका घर्ती तीनसय ९५ मत ल्याएर विजयी भएका हुन् ।

माओवादीका महिला सदस्य जुनसरी पुनले चारसय दुई मत, दलित महिला सदस्य रामकली विकले चारसय तीन मत, खुला सदस्य बुद्धिबहादुर घर्तीले चारसय चार मत, खुला सदस्य मैते घर्तीले चारसय मत ल्याएका छन् । थवाङको वडा नम्बर ५ तत्कालिन उवा गाविसमा पर्दछ ।

थवाङ गाउँपालिका अध्यक्षमा माओवादीबाट ऋषिकेशव बुढामगर र उपाध्यक्षमा शर्मिला बुढा चुनावी मैदानमा उत्रिएका थिए । यता, तीन पार्टीका संयूक्त उम्मेदवार विप्लव समुहका दलजित रोका र उपाध्यक्षमा रायनबहादुर रोकाले उम्मेदवारी दिएका थिए ।