पोखरा । गण्डकी प्रदेशका मुख्यमन्त्री पृथ्वीसुब्बा गुरुङ विरुद्धको अविश्वासको प्रस्तावमाथि यहीँ वैशाख २७ गते मतदान हुने भएको छ । कार्यव्यवस्था परामर्श समितिको आज बिहीबार बसेको बैठकले २७ गते बैठक गर्ने प्रस्ताव राखेपछि र त्यसमा दलहरुले आ–आफ्नो अडान छाड्दै सहमत भएका हुन् ।

सत्तारुढ नेकपा एमालेले वैशाख २८ गते र विपक्षी दलहरुले वैशाख २६ गते नै बैठक राख्नुपर्ने अडान लिएपनि अन्ततः दुवै पक्षहरु वैशाख २७ गते सहमत भएका हुन् । गत वैशाख १५ गते नै मुख्यमन्त्री गुरुङ विरुद्ध अविश्वासको प्रस्तावमाथि मतदान हुने कार्यसूची निर्धारण भएपनि जनमोर्चाका सांसद नै गायव बनाइएपछि बैठक रोकिएको थियो ।

प्रतिपक्षहरुले मुख्यमन्त्री गुरुङले कुर्ची जोगाउन सांसद अपहरण काण्डमा मुछिएका विवादित पात्र महेश बस्नेत र राजीव पहारीको टिम परिचालित गरी सांसद खिमबिक्रम शाहीलाई गायब बनाएको आरोप लगाएका थिए । घटनाको सम्पूर्ण प्रकृति र संलग्नता हेर्दा दलहरुले लगाएको आरोप पुष्टि हुने धेरै तथ्यहरु सार्वजनिक हुँदै आईरहेका पनि छन् ।

वैशाख १५ गते मुख्यमन्त्रीका विरुद्धमा अविश्वासको प्रस्तावमाथि मतदान हुँदै गर्दा एकाएक जनमोर्चाका सांसद शाही बेखबर बनाईएपछि जनमोर्चाकी सचेतक पियारी थापाले शाहीको जीउज्यानको सुरक्षाको माग गर्दै बैठक रोक्न निवेदन दिएकी थिइन् । सोही निवेदनका आधारमा सभामुख नेत्रनाथ अधिकारीले सूचना टाँस गर्दै अर्को सूचना जारी नभएसम्मका लागि बैठक स्थगित गरेका थिए ।