बुटवल, १३ कार्तिक । नवलपरासीको रामग्राममा ट्रकको ठक्करबाट एक मोटरसाइकल चालकको मृत्यु भएको छ।

पश्चिम नवलपरासीको रामग्राम नगरपालिका-२ स्थित सेतो पुलमा बुधबार मध्याह्न करिब सवा १२ बजे ट्रकको ठक्करबाट मोटरसाइकल चालकको निधन भएको हो। हुलाकी सडकखण्डमा पश्चिमबाट पूर्वतर्फ जाँदै गरेको लुम्बिनी प्रदेश ०१-००९ प ९६१९ नम्बरको मोटरसाइकललाई सोही दिशातर्फ गइरहेको प्रदेश ०१-००१ ख ३४९७ नम्बरको ट्रकले ठक्कर दिएको प्रहरीले जनाएको छ।

ट्रकको ठक्करबाट गम्भीर घाइते भएका रुपन्देहीको तिलोत्तमा नगरपालिका-१३ भलवारी निवासी अन्दाजी ४० वर्षीय पत्रकार पोषकान्त पोखरेललाई उपचारका लागि पृथ्वीचन्द्र अस्पताल लगिएको थियो। चिकित्सकले उनलाई मृत घोषणा गरेका थिए।

मृतक पोखरेल रुपन्देहीबाट ‘अग्निपरीक्षा’ नामक साप्ताहिक पत्रिका प्रकाशन गर्दै आएका थिए। उनको शव पोस्टमर्टमका लागि अस्पतालमै राखिएको छ। ठक्कर दिने ट्रक र चालक कञ्चनपुरको लालझाडी गाउँपालिका-६ निवासी २६ वर्षीय बन्धु रानालाई जिल्ला प्रहरी कार्यालय नवलपरासीले नियन्त्रणमा लिएको छ।