पोखरा, २४ साउन । पोखरामा जुवातास खेलिरहेको अवस्थामा कास्की प्रहरीले २८ हजार नगदसहित ६ जनालाई पक्राउ गरेको छ ।

जिल्ला प्रहरी कार्यालय कास्कीका अनुसार, पोखरा महानगरपालिका वडा नं. १७, ड्यामसाइड क्षेत्रमा जुवातास खेलिरहेको भन्ने विशेष सूचनाका आधारमा वडा प्रहरी कार्यालय बैदामबाट खटिएको टोलीले उनीहरूलाई पक्राउ गरेको हो ।

प्रहरीले घटनास्थलबाट नेपाली नगद २८ हजार ७० रुपैयाँ, भारतीय रुपैयाँ २ हजार ५ सय र १५६ पत्ती तास बरामद गरेको छ ।

पक्राउ परेका ६ जनालाई जिल्ला प्रशासन कार्यालय कास्कीबाट ५ दिनको म्याद थप गरी सार्वजनिक हित, स्वास्थ्य, सुरक्षा, सुविधा र नैतिकता विरुद्धको कसूरअन्तर्गत जुवा खेल्न वा सट्टेबाजी गर्न नहुने कसूरमा थप अनुसन्धान प्रक्रिया अगाडि बढाइएको प्रहरी नायव उपरीक्षक एवं सूचना अधिकारी वीरेन्द्र कुमार पासवानले जानकारी दिएका छन् ।