पोखरा । सामाजिक सञ्जाल फेसबुकबाट विभिन्न वाहनामा ठगी गर्ने एकजना प्रहरीको फन्दामा परेका छन् । जिल्ला प्रहरी कार्यालय स्याङ्जाको टोलीले बाजुरा जिल्लाको हिमाली गाउँपालिका वडा नं. ४ बस्ने २७ वर्षीय रुपचन्द्र पाण्डेलाई पक्राउ गरेको हो ।

ती पाण्डेले विश्वास दिलाई तत्कालै पैसा फिर्ता गर्छु भन्दै पटक–पटक गरी १० लाख २८ हजार सातसय रुपैयाँ ठगी गरी फरार भएका थिए । आफूलाई ठुलो समस्या परेको, विदेश (ब्राजिल)मा रहेको परिवार गम्भिर विरामी भएको भन्दै विभिन्न वाहना बनाएर एकजना महिलालाई सामाजिक सञ्जाल फेसबुकमार्फत् पैसा मागी ठगी गर्ने गरेको प्रहरीले जानकारी दिएको छ ।

घटनाका विषयमा जानकारी प्राप्त हुनासाथ अनुसन्धान गर्दै जाँदा ती पाण्डेलाई मंसिर ५ गते जिल्ला बाँके नेपालगञ्जबाट पक्राउ गरिएको गण्डकी प्रदेश प्रहरी कार्यालय पोखराले जानकारी दिएको छ । पक्राउ परेका पाण्डेलाई ठगी, आपराधिक विश्वासघात तथा आपराधिक लाभ (एक्सटर्सन) सम्बन्धी कसूरमा मुद्दा दर्ता गरी घटनाका विषयमा थप अनुसन्धान भईरहेको छ ।