काठमाडौँ, १३ असार । यस वर्षको माध्यमिक शिक्षा परीक्षा (एसईई) २०८१ को नतिजा सार्वजनिक भएको छ। शुक्रबार साँझ राष्ट्रिय परीक्षा बोर्डको बैठकले नतिजा सार्वजनिक गरेको हो। बोर्डले सार्वजनिक गरेको विवरणअनुसार, यो वर्षको नतिजा अघिल्लो वर्षको तुलनामा उल्लेखनीय रूपमा सुधारिएको छ।

बोर्डका अनुसार नियमिततर्फ परीक्षामा सहभागी ४ लाख ३८ हजार ८९६ जना विद्यार्थीमध्ये ६१.८१ प्रतिशत अर्थात् २ लाख ७१ हजार २९९ जना उत्तीर्ण भएका छन्। अघिल्लो वर्ष (२०८०) मा मात्र ४७.८६ प्रतिशत विद्यार्थी ग्रेडेड (उत्तीर्ण) भएका थिए। यसपटक १३.९५ प्रतिशतको सुधार देखिएको हो।

यसबाहेक, १ लाख ६७ हजार ५९७ विद्यार्थी फेल भएका छन् भने १२६ जनाको परीक्षा विभिन्न कारणले रद्द गरिएको छ।

उच्च जीपीए ल्याउनेको संख्या
बोर्डले सार्वजनिक गरेको तथ्याङ्कअनुसार, ४८ हजार १ सय ७७ जनाले ३.६० देखि ४.०० जीपीए ल्याएका छन्।
त्यसपछि ३.२१ देखि ३.६० जीपीए ल्याउनेको संख्या ८१ हजार ३८५ जना रहेको छ।
त्यस्तै ८९ हजार १२४ जनाले २.८१ देखि ३.२० जीपीए ल्याएका छन्।
२.४१ देखि २.८० जीपीए ल्याउने ४८ हजार ४७९,
२.०१ देखि २.४० जीपीए ल्याउने ४,१२६
र १.६० देखि २.०० बीच जीपीए ल्याउने विद्यार्थीको संख्या ८ जना रहेको छ।

प्रदेशगत नतिजा
यस वर्ष पनि बागमती प्रदेशका विद्यार्थी उत्तीर्णतामा अग्रपंक्तिमा देखिएका छन्। बागमतीबाट १ लाख १९ हजार ५१७ जना विद्यार्थी उत्तीर्ण भएका छन्। त्यसपछि लुम्बिनी प्रदेशबाट ९७ हजार ६८७, सुदूरपश्चिमबाट ५९ हजार ८०४, मधेसबाट ५९ हजार ७४९, गण्डकीबाट ४७ हजार ८४९, कोशीबाट ४७ हजार ८३५ र कर्णाली प्रदेशबाट ४६ हजार ४५५ जना विद्यार्थी उत्तीर्ण भएका छन्।

नतिजा हेर्ने तरिका
विद्यार्थीले आफ्नो नतिजा https://neb.gov.np, see.ntc.net.np लगायतका वेबसाइटमार्फत हेर्न सक्नेछन्। यस्तै, १६०० मा फोन गरी वा ३५००१ मा सन्देश पठाएर पनि नतिजा थाहा पाउन सकिने बोर्डले जनाएको छ।