पोखरा । पोखरा–६ बैदाम जरेवरस्थित भाडापसलको सटर फोरेर सामानहरु चेरी गर्ने दुईजनालाई जिल्ला प्रहरी कार्यालय कास्कीले पक्राउ गर्न सफल भएको छ । गत कार्तिक १९ गते विहान साढे ५ बजेको समयमा जरेबरस्थित फुलमाया केसीको घरमा भएको भाडापसलमा चोरी भएको थियो ।

पोखरा–२४ पामे बस्ने गंगाधर दवाडीले सञ्चालन गरेको उक्त भाडापसलको सटर फोरेर काँचको कचौंरा एकसय २० थान, काँचको थाल ७ थान र नगद ३० हजार रुपैयाँ चोरी गरेको सूचनाका आधारमा वडा प्रहरी कार्यालय बैदामको टोलीले खोजतलास तथा अनुसन्धान गरेको थियो । सोही क्रममा कार्तिक २० गते वडा नं. ६ को शान्तिपाटनस्थित तनहुँ, शुक्लागण्डकी नगरपालिका वडा नं.७ घर भई हाल पोखरा–९ बस्ने वर्ष १९ को सुजन तामाङ र १९ वर्ष कैं मनिष खड्कालाई प्रहरीले पक्राउ गर्न सफल भएको थियो ।

यी दुई व्यक्तिहरुलाई काँचको कचौंरा ६७ थान, काँचको थाल ४ थान र नगद नौंहजार ६सय रुपैयाँ सहित प्रहरीले पक्राउ गरी चोरी तथा डाँका सम्बन्धी कसुर अन्तर्गत थप अनुसन्धान अघि बढाएको जिल्ला प्रहरी कार्यालय कास्कीका प्रवक्ता एवम् सूचना अधिकारी डिएसपी सुवास हमालले जानकारी दिएका छन् ।