पोखरा । जिल्ला प्रहरी कार्यालय कास्कीले मानव बेचबिखन तथा ओसारपसारमा संलग्न भएको अभियोगमा तीनजनालाई पक्राउ गरेको छ । विभिन्न जिल्लाबाट दुईजना महिलाहरुलाई वैदेशिक रोजगारीको लागि विदेश पठाईदिने र विदेश जानका लागि आवश्यक रकम आफैंले उपलब्ध गराई दिने प्रलोभनमा पारी पोखरा ल्याएर जबरजस्ती वेश्यावृत्तिमा संलग्न गराउन खोज्ने व्यक्तिहरुलाई कास्की प्रहरीले पक्राउ गर्न सफल भएको हो ।

पोखरा ६ लेकसाईडस्थित कोठामा बन्धक बनाई शारीरिक तथा मानसिक यातना दिदैं जबरजस्ती वेश्यावृत्तिमा संलग्न गराउने उद्देश्यले रकमको मोलमलाई गरिरहेको अवस्थामा प्रहरीले कास्की जिल्ला मादी गाउँपालिका वडा नं. १ खेलुङ बस्ने वर्ष २१ का जीवन नेपाली, काभ्रे जिल्ला पाँचखाल वडा नं. ४ तामाघाट बस्ने वर्ष २६ को आशिष भूजेल र पोखरा महानगरपालिका वडा नं. ४ बगालेटोल बस्ने वर्ष ३० की अञ्जु गुरुङलाई पक्राउ गरिएको जिल्ला प्रहरी कार्यालय कास्कीका प्रवक्ता एवम् सुचना अधिकारी प्रहरी नायव उपरीक्षक सुवास हमालले जानकारी दिएका छन् ।

ती पक्राउ परेकोहरुलाई मानव वेचबिखन तथा ओसारपसार सम्बन्धी कसुर अन्तर्गत आठ दिन म्याद थप गरी अनुसन्धान भईरहेको छ । कास्की प्रहरीले ती पीडित महिलाहरुलाई मनोपरामर्श गरी संरक्षण केन्द्रमा राखेर आफन्तको जिम्मा लगाउने तयारी गरिरहेका प्रवक्ता डिएसपी हमालले जानकारी दिए ।