पोखरा, २४ चैत । पोखरामा जारी २०औं खुला प्याराग्लाइडिङ च्याम्पियनसिपमा एक्युरेसी प्रतियोगिताअन्तर्गत सोलो ओभरअलमा दुई दिनसम्मको प्रतिस्पर्धामा १२ अंकसहित नेपाल आर्मीका सागर जलारी अग्रस्थानमा छन्। विष्णु तिमिल्सिना १३ अंक ल्याएर दोस्रो र अमन थापाले १४ अंक ल्याएर तेस्रो स्थानामा रहेका छन्।

त्यसैगरी ओभरअल महिलातर्फ दुर्गा माया गुरुङ २०९ अंक ल्याएर प्रथम स्थानमा रहेकी छन्। स्वस्तिका गुरुङ ३७५ अंक ल्याएर दोस्रो र विद्या राई ६ सय १६ अंक ल्याएर तेस्रो स्थानमा रहेको प्रतिस्पर्धाका निर्णायक समितिका संयोजक योगश भट्टराईले बताए।

टेण्डम ओभरअलमा तीन राउण्ड प्रतिस्पर्धा हुँदासम्म इन्द्र नेपाली ४२ नम्बरसहित पहिलो स्थानमा रहेका छन्। त्यस्तै न्युरेन राना ११८ नम्बरसहित दोस्रो स्थानमा रहँदा विकास परियार १८४ अंक ल्याएर तेस्रो स्थानमा छन्। प्रतियोगितामा ६ राउण्ड सोलो प्रतिस्पर्धा हुने छ। शुक्रबार बाँकी राउण्ड प्रतिस्पर्धा भएर विजयी घोषण हुने छ।

शुक्रबार एक्रोरोब्याटिक सो र कस्ट्यम सोअन्तर्गत पनि प्रतिस्पर्धा हुने छ। बाँकी खेलका अन्तिम प्रतिस्पर्धा पनि शुक्रबार नै हुने नेपाल हवाई खेलकुद संस्थाका अध्यक्ष कृष्ण भण्डारीले बताए। बुधबारदेखि सुरु भएको प्रतियोगितामा ८ महिला सहित ९९ प्याराग्लाइडिङ पाइलोटको सहभागिता रहेको छ। प्रतियोगितामा महिला–पुरुष तथा टिमतर्फ गरी ७ इभेन्टमा प्रतिस्पर्धा भइरहेको छ।

पहिलो, दोस्रो, तेस्रो र चौथो हुने खेलाडीले एक्युरेसी सोलो ल्याण्डीङ ओभरअलतर्फ क्रमश ५०, ३०, २० र १० हजार रुपैँया प्राप्त गर्नेछन्। महिलातर्फ ३०, २०, १० र ५ हजार रुपैँया प्राप्त गर्नेछन्। एक्युरेसी टेण्डम ल्यान्डिङ ओभरअल र एक्युरेसी टिम टेण्डम ल्याण्डडिङ ओभरअलमा पहिलो दोस्रो र तेस्रो हुनेले क्रमशः ३०, २०, १० र ५ हजारसहित मेडल तथा प्रमाणपत्र पाउने छन्।

एक्रोब्याटिक प्रदर्शन, एयर ओभरअल तर्फ पहिलो, दोस्रो र तेस्रो हुनेलाई क्रमशः १५, १० र ५ हजार प्रास्तव गर्नेछन्। बेस्ट कस्ट्युमतर्फ उत्कृष्ट एक खेलाडीलाई १० हजार रुपैँया प्रदान गरिने आयोजक संस्थाका अध्यक्ष भण्डारीले बताए।