काठमाडौँ । नेकपा एमालेका महासचिव शंकर पोखरेलले विकास र समृद्धिको आशलाग्दो यात्रामा अघि बढ्दा एमालेको शक्ति र लोकप्रियतालाई रोक्न पाँच दलीय गठबन्धन बनेको बताएका छन् ।

महासचिव पोखरेलले अव हुने तीन तहको चुनावसँगै पुरानो जनादेश खण्डित हुने र त्यसको ठाउँमा नयाँ जनादेशले ठाउँ लिने पनि बताएका छन् ।

बुधबार सामाजिक सञ्जालमा लेख्दै महासचिव पोखरेलले भनेका छन्, ‘जनादेशको सम्मान,राष्ट्रिय स्वाधिनता र स्वाभिमानको रक्षा र विकास र समृद्धिको आशलाग्दो यात्रामा अघि बढ्दा एमालेको बढ्दो शक्ति र लोकप्रियतालाई रोक्न बनेको हो पाँच दलीय गठबन्धन ।’

त्यस्तै उनले चुनावमा जनता नै न्यायाधीश हुने भन्दै अब हुने तीन तहको चुनावसँगै पुरानो जनादेश खण्डित हुने र त्यसको ठाउँ नयाँ जनादेशले लिने दावी समेत गरेका छन् ।

चुनावमा जनता जनार्दन नै न्यायाधीश हुन्छन् । एजेण्डा विहिन गठबन्धनले होइन, देश र जनताका पक्षको एजेन्डाबाट नै चुनाव जित्ने हो’, पोखरेलले भनेका छन्, ‘अब सिंगो पार्टी पंक्ति विगतमा हामीले गरेका राम्रा काम र गर्न चाहेको कामको फेरिस्त बोकेर जनताका बीचमा जाऔं । जनताको फैसला सत्य र न्यायको पक्षमा हुनेछ ।’

एमालेको सचिवालय बैठक आज बस्ने भएको छ। भक्तपुरस्थित जर्मन हस्पिटालिटी होम्समा आज दिउँसो १ बजे सचिवालय बैठक बस्ने भएको तयारी रहेको प्रचार विभाग उपप्रमुख विष्णु रिजालले जानकारी दिए।

१९ सदस्यीय सचिवालय बैठकमा स्थानीय तह निर्वाचन, पार्टी संगठनलगायत विभिन्न विषयमा छलफल गर्ने तयारी छ। बाँकी रहेका जिल्ला अधिवेशन गर्ने, प्रदेश अधिवेशनलगायत विषयमा पनि छलफल हुनेछ।

कोरोनालगायत कारणले एमालेले केही जिल्लामा अधिवेशन गरेको छैन। सातै प्रदेश अधिवेशन पनि बाँकी छ। गत मंसिरमा केन्द्रीय महाधिवेशन भएको थियो।