काठमाडाैं । नेपाली काँग्रेसको १४ औँ महाधिवेशन अन्तर्गत पूर्व निर्धारित मितिअनुसार वडा अधिवेशन सम्पन्न भएका जिल्लामा आजदेखि गाउँ/नगर अधिवेशन सुरु भएको छ । काँग्रेस केन्द्रीय निर्वाचन समितिका अनुसार वडा अधिवेशन भई अन्तिम मत परिणाम प्राप्त भएका अधिकांश जिल्लामा आजदेखि गाउँ÷नगर अधिवेशन सुरु भएको निर्वाचन समितिका सदस्य जगन्नाथ श्रेष्ठले बताए ।

काँग्रेसको वडा अधिवेशन गत भदौ १८ गतेदेखि प्रारम्भ भएको थियो । काँग्रेसले हालसम्म ६४ जिल्लामा वडा अधिवेशन सम्पन्न गरिसकेको छ । सङ्घीय राजधानी काठमाडौँमा वडा अधिवेशनको अन्तिम मत परिणाम प्राप्त नभएका कारण यहाँको पालिका अधिवेशन यही असोज १६ गतेका लागि तय गरिएको छ ।

काठमाडौँको वडा अधिवेशन असोज ५ गते सुरु भएको थियो । एक महानगरपालिका र १० नगरपालिका रहेको काठमाडौँका सबै नगर र महानगरको वडा अधिवेशनको मत परिणाम प्राप्त नहुँदा आज पालिका अधिवेशन आरम्भ गर्न नसकिएको जिल्ला निर्वाचन अधिकृत नरहरि आचार्यले बताए ।

ललितपुरको पालिका स्तरको अधिवेशन सोमबार हुने भएको छ। प्राविधिक कारण तथा वडा अधिवेशनबाट निर्वाचित सूची तयार गर्न समय लागेकोले सारेको बताइएको छ। काभ्रेमा जिल्ला कार्य समिति र निर्वाचन समितिबीच विवाद हुँदा हुँदै पालिका अधिवेशन विवादमा छ । जिल्ला सभापति मधु आचार्यले निर्वाचन अधिकृत बेपत्ता भएको सूचना जारी गरेका छन्।

निर्वाचन अधिकृत राजेन्द्र लामिछाने सम्पर्क विहीन भएकाले पालिका अधिवेशन अनिश्चितकालका लागि रोकेको उनले सूचना जारी गरेका थिए। निर्वाचन समिति वा केन्द्रीय समितिले स्थगित गरे मात्रै अधिवेशन रोकिने भएकाले आचार्यले स्थगित गर्न खोजेर काभ्रेको पालिका अधिवेशन नरोकिने भएको छ। निर्वाचन समितिका सदस्य जगन्नाथ श्रेष्ठ करिब ६० जिल्लामा आजै अधिवेशन सुरु हुने बताए ।

२१ जिल्लामा दसैँअघि जिल्ला अधिवेशन

असोज १८ भित्रै २१ जिल्लामा अधिवेशन सम्पन्न गर्ने काँग्रेसको तयारी छ । निर्वाचन समितिका सदस्य एकराज पोखरेलका अनुसार ताप्लेजुङ, संखुवासभा, सोलुखुम्बु, दोलखा, सिन्धुपाल्चोक, रसुवा, मनाङ, मुस्ताङ, डोल्पा, जुम्ला, मुगु, हुम्ला, कालिकोट, बाजुरा, बझाङ, दार्चुला, धादिङ, रामेछाप, गोरखा, रुकुम (पूर्व) र म्याग्दी गरी २१ जिल्लामा असोज १८ भित्र जिल्ला अधिवेशन सम्पन्न हुने छ । २१ वटा हिमाली जिल्लामध्ये १९ वडामा आजै पालिका अधिवेशन सुरु भएको छ । तर, डोल्पा र रसुवामा भने क्रियाशील सदस्यताकै टुंगो लागेको छैन ।

डोल्पा र रसुवाको अधिवेशनबारे सोधिएको प्रश्नमा पोखरेलले भने, ‘यो पनि दसैँअघि नै सकिन्छ । २१ जिल्लामा एक निर्वाचन क्षेत्र भएको जिल्लामा १५ गते सकिन्छ । १५ गतेदेखि २० गतेसम्म डोल्पा र रसुवामा पनि अधिवेशन सम्पन्न हुन्छ । दसैँअघि कुनै हालतमा २१ जिल्लाको अधिवेशन हुन्छ ।’

काँग्रेसले २१ जिल्लामा १२ असोजमा प्रदेश निर्वाचन सभा क्षेत्र, १५ असोजमा प्रतिनिधिसभा निर्वाचन क्षेत्र तथा एकमात्र क्षेत्र भएका जिल्लाको अधिवेशन र १८ असोजमा दुई वा सोभन्दा बढी क्षेत्र भएका जिल्लाको अधिवेशन गर्ने कार्यतालिका बनाएको छ । तर ५६ जिल्लामा भने उक्त कार्यतालिका लागू नहुने भएको छ । योसँगै कात्तिक १० देखि १२ गतेसम्म प्रदेश अधिवेशन पनि केही दिन सर्ने देखिएको छ । काँग्रेसको केन्द्रीय महाधिवेशन आगामी मंसिर ९ देखि १३ गतेसम्म तय गरिएको छ ।

महाधिवेशन प्रतिनिधित्व थप समावेशी

काँग्रेसले महाधिवेशन प्रतिनिधित्व थप समावेशी बनाएको छ । पालिका, प्रदेशसभा निर्वाचन क्षेत्र, प्रतिनिधि सभा निर्वाचन क्षेत्र र जिल्ला कार्यसमितिमा केन्द्रबाट पठाइएको सूचीमा परिवर्तन गरिएको हो ।

हालको व्यवस्थाअनुसार पालिकादेखि जिल्ला तहमा प्रतिनिधित्व नभएको भएमा क्षेत्रीय प्रतिनिधिमध्येबाट कम्तीमा एक दलित सदस्य र मधेशी वा थारु वा मुस्लिम वा अल्पसङ्ख्यक वा अपाङ्गता भएका व्यक्ति मध्येबाट एक सदस्य थप निर्वाचित हुने व्यवस्था गर्ने काँग्रेसले निर्णय गरेको छ । शुक्रबारको पार्टी पदाधिकारी एवं पूर्वपदाधिकारीसहितको उक्त निर्णय गरेको काँग्रेस मुख्य सचिव कृष्णप्रसाद पौडेलले जानकारी दिए ।

१३ जिल्लामा वडा अधिवेशन अनिश्चित

काँग्रेसको क्रियाशील सदस्यता विवाद टुङ्गिन बाँकी १३ जिल्लामा वडा अधिवेशन सुरु हुन सकेको छैन । क्रियाशील सदस्यताको टुंगो लाग्न बाँकी रहेका पर्सा, बारा, रौतहट, सर्लाही, महोत्तरी, धनुषा, सिरहा, सप्तरी, डोल्पा, रसुवा, बाँके, सुर्खेत र कैलालीमा वडा अधिवेशन नै सरु हुन सकेको छैन ।

क्रियाशील सदस्यता विवरण प्राप्त नहुँदा अधिवेशन प्रक्रिया प्रारम्भ गर्न नसकिएको समितिका संयोजक महादेवप्रसाद यादवले जानकारी दिए । काँग्रेस पदाधिकारी र पूर्वपदाधिकारीको शुक्रबार बसेको बैठकले क्रियाशील सदस्यताको बाँकी विवाद चाँडै टुङ्ग्याएर दशैँ अघिसम्म सबै जिल्लामा पालिकाको अधिवेशन सम्पन्न गर्ने निर्णय गरेको छ ।