पोखरा । गण्डकी प्रदेशमा पूर्वमुख्यमन्त्री र वर्तमान सरकार बीच भ्रष्टाचारको आरोप–प्रत्यारोप चलिरहेको छ । वर्तमान सरकारले तत्कालिन मुख्यमन्त्री पृथ्वीसुब्बा गुरुङले बजेटमा नै नभएको आयोजनाहरुको ठेक्का लगाएको भन्दै विरोध गरिरहेको सन्दर्भमा आज पत्रकार सम्मेलन गर्दै प्रतिपक्ष दलका नेता गुरुङले उल्टै सरकारमाथि नै भ्रष्टाचारको आरोप लगाएका छन् ।

एमाले संसदीय दलका नेता एवं निर्वतमान मुख्यमन्त्री गुरुङले आज शनिबार पत्रकार सम्मेलनको आयोजना गर्दै गण्डकी प्रदेशका मुख्यमन्त्री कृष्णचन्द्र नेपाली पोखरेलको नेतृत्वको सरकारले भ्रष्टाचारको शुरुवात गरेको आरोप लगाए ।

मुख्यमन्त्री पोखरेल नेतृत्वको प्रदेश सरकारले कार्यकर्ता पोस्न १६ करोडभन्दा बढि रकम रकमान्तर गर्दै भ्रष्टाचारको शुरुवात गरेको आरोप लगाए । ‘गैरबजेटरी खर्च नै भ्रष्टाचारको पहिलो सुरुवात हो,’ प्रतिपक्ष दलका नेता गुरुङले भने–‘उहाँहरुले भ्रष्टाचारको शुरुवात गरिसक्नु भएको छ ।’

वर्तमान सरकारका प्रवक्ता तथा सामाजिक विकास मन्त्री कुमार खड्काले निवर्तमान मुख्यमन्त्री गुरुङले बजेटमा नै नभएको १० वटा बहुबर्षे आयोजनामा ४ अर्ब ५१ करोड रुपैयाँको ठेक्का लगाएको आरोप लगाएका थिए । त्यसको खण्डन गर्दै निवर्तमान मुख्यमन्त्री गुरुङले उल्टै सरकारमाथि नै भ्रष्टाचारको आरोप लगाएका छन् ।

गठबन्धनका सांसदहरूको मागका आधारमा भन्दै नयाँ गठित सरकारले रातो किताबमा उल्लेख नरहेका डेढ सय योजनामा असार दोस्रो साता बजेट विनियोजन गरेको थियो । गुरुङले भने–‘योजनामा बजेट विनियोजन गरेर मात्र हुँदैन, टेण्डर गर्नुपर्यो, नभए उपभोक्ता समिति गठन गर्नुपर्ने होला, १० दिनमा यो सम्भव हुँदैन ।’ मन्त्री खड्काले आफ्नो गल्ती ढाकछोप गर्न झ्याली पिटेको भन्दै लगाईएको आरोप मिथ्या रहेको नेता गुरुङको भनाई थियो ।

पोखरेल नेतृत्वको प्रदेश सरकारले नयाँ सरकार गठन भएको १ महिना बित्न लाग्दा समेत आजसम्म न त मन्त्रिपरिषद् विस्तार गर्न सकेको छ, न त असार १ गते संसदमा पेश गरेको बजेटमाथि अझै छलफल भएको छ ।

बजेट पास भएपछि मात्रै मन्त्रिपरिषद् विस्तार गर्ने धारणा मुख्यमन्त्री पोखरेलले सार्वजनिक गरिसकेका छन् । बजेटका सन्दर्भमा संसद बैठक बोलाएर छलफल हुँदैछ । प्रतिपक्ष दल नेकपा एमालेका नेता गुरुङले आज आयोजित पत्रकार सम्मेलनमा प्रदेश सरकारले ल्याउने रातो किताब हेरेरमात्र बजेटमाथि समर्थन वा विरोध गर्ने जनाएका छन् ।