पोखरा । गण्डकी प्रदेशका मुख्यमन्त्री बनेका कृष्णचन्द्र नेपाली पोखरेलले २५ दिन बितिसक्दा पनि मन्त्रिपरिषद् विस्तार गर्न सकेका छैनन् । ११ वटा मन्त्रालय रहेको यस प्रदेशमा सत्ता साझेदार दलहरु बीच सहमति हुन नसक्दा मन्त्रिपरिषद् विस्तार हुन नसकेको हो ।
प्रदेशले मन्त्री नियुक्त र जिम्मेवारी बाँडफाँट गर्न नसकेपछि यसको जिम्मा केन्द्रीय नेताहरुलाई नैं दिईएको छ । यद्यपि प्रदेशमा देखिएको विवादले सत्ता साझेदारीकोे गठबन्धन नटुट्ने दावी मुख्यमन्त्री पोखरेलले गरेका छन् ।
मुख्यमन्त्री तथा मन्त्रिपरिषद कार्यालयमा आज भएको पत्रकार सम्मेलनमा बोल्दै मुख्यमन्त्री पोखरेलले भने, ‘यो गठबन्धन राष्ट्रिय परिस्थितिको उपज हो । केन्द्रमा जस्तै प्रदेशमा गठबन्धन बनेको हो । अहिलेको विवादले गठबन्धन टुट्दैन ।’
बजेट पारित भएपछि मात्रै मन्त्रिपरिषद्ले पूर्णता पाउने मुख्यमन्त्री पोखरेलले बताए । असार ४ गते नै विश्वासको मत लिईसकेका मुख्यमन्त्री पोखरेलले यही साता भित्रमा सदन बोलाएर बजेटमाथि छलफल गर्ने बताए ।
अहिले गण्डकी प्रदेशमा मुख्यमन्त्री र चार जना मन्त्री मात्र छन् । कांग्रेस नेता कुमार खड्कालाई सामाजिक विकास मन्त्रालय र माओवादी केन्द्रका मधुमाया अधिकारीलाई स्वास्थ्य तथा जनसंख्या मन्त्रालयको जिम्मेवारी दिईएको छ । तरसँगै सपथ खाएका जनता समाजवादी पार्टीका हरिशरण आचार्य र स्वतन्त्र सांसद राजीव गुरुङ उर्फ दीपक मनाङेले मन्त्रीको सपथ लिए पनि उनीहरुको आजसम्म मन्त्रालयको टुङ्गो लाग्न सकेको छैन ।
निवर्तमान मूख्यमन्त्री पृथ्वीसुब्बा गुरुङको सरकार ढाल्न जसपाका आचार्यलाई विश्वासको मत लिनु अघि अर्थमन्त्रालय दिने लिखित सहमति गरेका मुख्यमन्त्री पोखरेलले कांग्रेस र माओवादी कैं कारण सहमति कार्यान्वयन गर्न सकेका छैनन् । त्यसैगरी स्वतन्त्र सांसद दीपक मनाङेले पनि आफूले भनेको मन्त्रालय नपाएको भन्दै जिम्मेवारी नै सम्हालेका छैनन् ।