लमजुङ । जिल्ला प्रहरी कार्यालय लमजुङमा १३ महिनाको समयमा सबैभन्दा धेरै यौनजन्य अपराध सम्बन्धी मुद्दाहरु दर्ता गरिएका छन् । १३ महिनामा दर्ता भएका ९० वटा मुद्दाहरुमा जबरजस्ती करणीका १३ वटा मुद्दामा प्रहरीले आरोपितहरुलाई पक्राउ गरी कारवाही गर्न सफल भएको छ ।

ईलाम सरुवा भएर जान लागेका जिल्ला प्रहरी कार्यालयका प्रमुख प्रहरी नायव उपरीक्षक (डीएसपी) गंगाबहादुर थापाले लमजुङमा १३ महिना कार्यरत रहँदा गरेका कामहरुको बारेमा आज जानकारी दिदैं विवादरहित भएर जनताको सेवा गर्न पाएकोमा खुशी व्यक्त गरे ।

२०५९ सालमा हत्या गरी फरार भएका आरोपित ३ जना व्यक्तिसहित अन्य मुद्दाहरुमा फरार ५२ जना व्यक्तिहरुलाई आफ्नो कार्यकालमा पक्राउ गर्न सफल भएको डीएसपी थापाले जानकारी दिए । त्यसैगरी लागूपदार्थ सेवनका कारण बढ्दो अपराध न्यूनिकरण गर्नका लागि सञ्चालित गाँजा फडानी अभियानमा लमजुङ प्रहरीले ५२ हजार दुईसय ६२ गाँजाको बोट फडानी गर्दै महत्वपूर्ण भूमिका निर्वाह गर्दै आईरहेको पनि डीएसपी थापाको भनाई थियो ।

लमजुङ प्रहरीले लागूऔषध दुव्र्यसनबाट बच्न र महिला तथा बालबालिका हिंसा न्यूनिकरण गर्नका लागि विभिन्न समयमा प्रशिक्षण कार्यक्रमहरुको आयोजना गर्दै आईरहेको थियो । शान्ति सुरक्षालाई चुस्त दुरुस्त बनाउन लमजुङका विभिन्न स्थानहरुमा अस्थायी प्रहरी बिट सञ्चालनमा ल्याइएका थिए ।

पछिल्लो समय लमजुङ प्रहरीले ४ वटा कर्तव्य ज्यान मुद्दा, लागूऔषध मुद्दामा ८ जना, जंगली जनावरको तस्करी सम्बन्धमा १ जनालाई पक्राउ गरी कारवाही गर्न सफल भएको थियो । विभिन्न समयमा जुवा तास खेल्नेहरु ५१ जनालाई लमजुङ प्रहरीले पक्राउ गरी कारवाही गरेको थियो । विष्फोटक पदार्थको मुद्दामा ६ जनालाई प्रहरीले पक्राउ गरेको थियो ।

अवैध काठ तस्करी गर्नेहरुबाट लमजुङ प्रहरीले ३४ लाख ८७ हजार दुईसय ६१ रुपैयाँ जरिवाना उठाएको छ । त्यसैगरी कोभिडको चेकजाँच गर्ने र माक्स वितरण लगायतका जनचेतनामूलक कार्यक्रमहरुको पनि आयोजना गरेको थियो । साथै निषेधाज्ञा उल्लंघन गर्नेहरुबाट ३ लाख २१ हजार रुपैयाँ राजश्व संकलन गरिएको छ ।