पोखरा । गण्डकी प्रदेशका मुख्यमन्त्री कृष्णचन्द्र नेपाली पोखरेलले आज विश्वासको मत मागेका छन् । प्रदेश सभामा मुख्यमन्त्री पोखरेलको प्रस्तावमाथि छलफल भईरहेको छ ।

जेठ २९ गते मुख्यमन्त्री बनेका पोखरेलले विश्वासको मतका लागि आज प्रदेश सभामा प्रस्ताव पेश गरेका हुन् । संविधानको धारा १६८ (५) अनुसार मुख्यमन्त्री नियुक्त भएका पोखरेलले ३० दिनभित्र विश्वासको मत लिनुपर्ने व्यवस्था अनुसार आज विश्वासको मत मागेका हुन् ।

५९ सदस्यीय गण्डकी प्रदेश सभामा ३१ मतका साथ विपक्षी गठबन्धनबाट नेपाली कांग्रेस संसदीय दलका नेता पोखरेल मुख्यमन्त्री नियुक्त भएका थिए । मुख्यमन्त्री पोखरेललाई माओवादी केन्द्र, जसपा र राष्ट्रिय जनमोर्चाका साथै स्वतन्त्र सांसद राजीव गुरुङ उर्फ दीपक मनाङेको समर्थन रहेको छ ।

यस अघि निवर्तमान मुख्यमन्त्री पृथ्वी सुब्बा गुरुङले विश्वासको मत पाउन नसकेपछि प्रतिपक्ष दलको गठबन्धनका तर्फबाट पोखरेल जेठ २९ गते मुख्यमन्त्री भएका थिए ।