News Portal

ताजा शिर्षकहरु

चर्चित शिर्षकहरु

प्रमुख समाचार राजनीति

गण्डकी प्रदेशको मुख्यमन्त्रीमा कृष्णचन्द्र नेपाली

'आफूलाई समर्थन गर्ने दलहरुबाट एक–एक जना मन्त्री समेटेर पाँच सदस्यीय मन्त्रिपरिषद् गठन'

पोखरा । गण्डकी प्रदेशको मुख्यमन्त्रीमा नेपाली कांग्रेसका संसदीय दलका नेता कृष्णचन्द्र नेपाली पोखरेल नियुक्त भएका छन् । गण्डकी प्रदेशका नवनियुक्त मुख्यमन्त्री पोखरेलले मन्त्रिपरिषद् पनि विस्तार गरिसकेका छन् । मुख्यमन्त्री पोखरेलले आफूलाई समर्थन गर्ने दलहरुबाट एक–एक जना मन्त्री समेटेर पाँच सदस्यीय मन्त्रिपरिषद् बनाएका हुन् ।

पोखरेलको दल नेपाली कांग्रेसबाट कुमार खड्का मन्त्री बनेका छन् भने माओवादी केन्द्रबाट मधु अधिकारी (गुरुङ), जनता समाजवादी पार्टी (जसपा)बाट हरिशरण आचार्य र स्वतन्त्र प्रदेशसभा सदस्य दीपक मनाङे मन्त्री बनेका हुन् । चारैजना मन्त्री विना विभागीय हुन् । मुख्यमन्त्री पोखरेल र मन्त्रीहरुले प्रदेश प्रमुख सीता पौडेलसामु पद तथा गोपनीयताको सपथ लिएका छन् ।

प्रदेश प्रमुख सीताकुमारी पौडेलले संविधानको धारा १६८ (५) अनुसार पोखरेललाई मुख्यमन्त्री नियुक्त गरेकी थिईन् । मुख्यमन्त्री नियुक्तका लागि आधार पेश गर्न आह्वान गरेपछि विपक्षी गठबन्धनको तर्फबाट पोखरेलले शुक्रबार दिउँसो नै ३१ प्रदेशसभा सदस्यको हस्ताक्षरसहित दाबी पेश गरेका थिए ।

सरकार गठनका लागि प्रदेश सभा प्रमुख पौडेलले दिएको २४ घण्टाको समय सकिए पछि विपक्षी गठबन्धनका सांसदहरु प्रदेश प्रमुखको निवास अगाडिको मुलगेटमा धर्ना दिएर बसेका थिए । आज दिउँसो ३ बजे भित्र निर्णय सार्वजनिक नहुँदा र केन्द्रबाट प्रदेशसभा भङ्ग गर्न प्रधानमन्त्री केपी शर्मा ओलीको ठाडो निर्देशन आएको भन्ने जानकारी लगत्तै सांसदहरु प्रदेश प्रमुखको निवास अगाडि सडकमा बसेर धर्ना दिएका थिए भने युवा तथा विद्यार्थी संगठनहरुले सडकमा आगो बाल्न शुरु गरिसकेका थिए ।

पुनः मुख्यमन्त्रीमा नेकपा एमालेका संसदीय दलका नेता पृथ्वीसुव्वा गुरुङले दावी गरेका विभिन्न समाचारहरु बाहिरिए पनि प्रदेश प्रमुखको कार्यालयले भने पोखरेलको मात्र दाबी परेकाले मुख्यमन्त्री नियुक्त गरिएको उलेख गरेको छ । मुख्यमन्त्रीमा नियुक्त पोखरेलले अब ३० दिनभित्र प्रदेशसभाबाट विश्वासको मत लिनुपर्छ ।

प्रतिक्रिया