पोखरा । राष्ट्रिय जनमोर्चाले केन्द्रीय सदस्य तथा गण्डकी प्रदेशका सांसद कृष्ण थापालाई पार्टी विपरितको काम गरेको भन्दै कारवाही गरेको छ । सांसद थापालाई पार्टीको साधारण सदस्य पनि नरहने गरी निलम्बित गरिएको हो ।

जनमोर्चाले सांसद थापालाई साधारण सदस्यबाट ६ महिनाका लागि निलम्बन गरे पनि सांसद पदच्यूत भने गरेको छैन । सांसद थापाले पार्टीको ह्वीप अस्विकार गर्दै गण्डकी प्रदेशमा मुख्यमन्त्री पृथ्वीसुब्बा गुरुङलाई सहयोग गरेका थिए ।

गण्डकी प्रदेशमा विपक्षी गठबन्धनलाई सहयोग गर्न पार्टी केन्द्रले गरेको निर्णयलाई लत्याउँदै र ह्वीपको समेत प्रवाह नगरी सांसद थापाले अराजनीतिक चरित्र प्रदर्शन गरेका थिए । जनमोर्चाका तीन सांसद मध्ये कृष्ण थापा र खिमबिक्रम शाहीले असहयोग गर्दा गण्डकीमा विपक्षी गठबन्धनको सरकार बन्न सकेन ।

पुनः मुख्यमन्त्रीको सपथ ग्रहण गरेका पृथ्वीसुब्बा गुरुङले अब केही समयपछि प्रदेशसभामा विश्वासको मत लिनुपर्ने हुन्छ । यदि, जनमोर्चाले आफ्ना तीन सांसदलाई कडाईका साथ प्रस्तुत गर्न सक्यो भने स्थिति फेरिन पनि सक्छ । तर विगतलाई हेर्दा थापा अर्का सांसद शाही भन्दा पनि चतुर र उग्र पनि देखिन्छन् । दुई सांसदको व्यवहार हेर्दा आर्थिक प्रलोभनमा परेर पार्टीको ह्वीप उल्लंघन गर्दै मुख्यमन्त्रीमा गुरुङलाई सहयोग गरेको आरोप लाग्ने गरेको छ ।