काठमाडौं । प्रतिनिधिसभा विघटन र चुनावको घोषणाका विरुद्धमा विपक्षी दलहरु छलफलमा जुटेका छन् । प्रमुख प्रतिपक्षी दल नेपाली कांग्रेस, माओवादी केन्द्र, जनता समाजवादी पार्टी र नेकपा एमालेका असन्तुष्ट पक्षसहितको सर्वपक्षीय बैठक बसेको हो ।

संसद् भवनको ल्होत्से हलमा सुरु भएको बैठकमा कांग्रेस सभापति शेरबहादुर देउवा, नेता रामचन्द्र पौडेल, विमलेन्द्र निधि, रामशरण महत, माओवादी केन्द्रका अध्यक्ष पुष्पकमल दाहाल, एमाले नेता माधव नेपाल, जसपा अध्यक्ष उपेन्द्र यादवलगायत नेताहरु सहभागी छन् । बैठकले आगामी कार्यक्रम र थप रणनीति तय गर्नेछ ।

मध्यरातमा प्रधानमन्त्री खड्गप्रसाद ओलीले राष्ट्रपति विद्यादेवी भण्डारी समक्ष प्रतिनिधिसभा विघटन र चुनाव घोषणाको सिफारिस गरेका थिए । सोही सिफारिसका आधारमा राष्ट्रपति भण्डारीले मध्यरातमा नै नेकपा एमालेका अध्यक्ष ओली र विपक्षी गठबन्धनका तर्फबाट प्रधानमन्त्रीका लागि प्रस्तावित कांग्रेस सभापति शेरबहादुर देउवाको दावी खारेज गर्दै प्रतिनिधि सभा विघटन र चुनावको घोषणा गरेकी थिईन् ।