News Portal

ताजा शिर्षकहरु

चर्चित शिर्षकहरु

प्रमुख समाचार राजनीति

प्रधानमन्त्रीका लागि ओली र देउवाको दाबी

काठमाडौं । प्रधानमन्त्रीका लागि नेकपा एमालेका अध्यक्ष खड्गप्रसाद ओली र विपक्षी गठबन्धनबाट नेपाली कांग्रेसका सभापति शेरबहादुर देउवाले प्रधानमन्त्रीमा दावी प्रस्तुत गरेका छन् । राष्ट्रपति विद्यादेवी भण्डारीले संविधानको धारा ७६ (५) अनुसार नयाँ सरकारको गठनलाई दिएको समय भित्रै ओली र देउवाले दावी प्रस्तुत गरेका हुन् ।

नेपाली कांग्रेस, नेकपा माओवादी केन्द्र, जनता समाजवादी पार्टीका भट्टराई–यादव पक्षका सांसद र एमालेका खनाल–नेपाल समूहका नेताहरु गरेर एकसय ४९ जना सांसदको हस्ताक्षरसहित कांग्रेस सभापति देउवाले राष्ट्रपति समक्ष प्रस्ताव प्रस्तुत गरेका हुन् ।

कांग्रेसका ६१, माओवादी केन्द्रका ४९, जसपाका १२, नेकपा एमालेको माधव नेपाल–झलनाथ खनाल पक्षका २६ सांसद र राष्ट्रिय जनमोर्चाका एक सांसदले देउवालाई प्रधानमन्त्री बनाउने प्रस्तावमा हस्ताक्षर गरेका छन् ।

यस्तै नेकपा एमालेका अध्यक्ष ओलीले विपक्षी गठबन्धनहरु पुग्नुभन्दा पहिला नै शितल निवासमा पुगेर एमालेका एकसय २१ जना र जनता समाजवादी पार्टीका ३२ सांसदको हस्ताक्षरसहितको प्रस्ताव राष्ट्रपति समक्ष पेश गरेका हुन्।