काठमाडौं । कोरोना संक्रमणका कारण ३४ वर्षका पत्रकार शान्तिराम कार्कीको निधन भएको छ । नेपाल पत्रकार महासंघ च्यानल नेपाल प्रतिष्ठान शाखाका अध्यक्ष कार्कीको शनिबार साँझ ८ बजे निधन भएको हो ।

पत्रकार कार्कीलाई गत वैशाख १९ गते कोरोना सङ्क्रमण पुष्टि भएको थियो । सोही दिनदेखि काठमाडौँको स्वयम्भूस्थित मनमोहन मेमोरियल अस्पतालमा उपचारत कार्कीको स्वास्थ्यमा थप समस्या आएपछि वैशाख २३ गतेदेखि भेन्टिलेटरमा राखी उपचार भइरहेकामा शनिबार साँझ ८ः०० बजे निधन भएको हो ।

झापा निवासी कार्की विगत डेढ दशकदेखि काठमाडौँमा रही पत्रकारितामा सक्रिय थिए । जनता टाइम्स डटकमका सम्पादक कार्कीले सौर्य दैनिकमा सहसम्पादकको जिम्मेवारी वहन गर्दै आईरहेका थिए । कोरोनाकै कारण हालसम्म १३ पत्रकारको निधन भएको छ भने सात सय ५० भन्दा बढी पत्रकार संक्रमित भएका छन् ।