पोखरा । यतिबेला पोखरा कोरोना संक्रमणको घटनाले भन्दा पनि राजनीतिक वितण्डाहरुले तातिरहेको छ । सत्ता जोगाउन मुख्यमन्त्री पृथ्वीसुब्बा गुरुङले गरेका हर्कतहरुले यतिबेला पोखरा चर्चाको केन्द्रमा रहेको हो । अन्ततः सत्ता जोगाउन मुख्यमन्त्री गुरुङ अपराधिक पृष्ठभूमि भएका कुख्यात पात्र राजीव गुरुङ उर्फ दीपक मनाङ्गेको शरणमा परेका छन् ।

सत्ता नै संकटमा परेपछि मध्यरातमा हिउँदे अधिवेशन अन्त्य गरेर काठमाडौं पुगेका मुख्यमन्त्री गुरुङले सत्ता जोगाउन अनेकन् तिकडमहरु गरिरहेका छन् । जसमध्ये अविश्वास प्रस्तावमाथि दोस्रोपटकको छलफल र मतदान गर्ने क्रममा मतदान गर्ने समयमा जनमोर्चाका सांसद खिमबिक्रम शाहीलाई कोरोना संक्रमितको नाममा नक्कली रिपोर्ट तयार पारेर वेपत्ता बनाईएको थियो । जुन घटना अझै सेलाएको छैन ।

पदका लागि निकै वार्गेनिङ्ग गरिरहेका दीपक मनाङ्गे भने सो दिन अनुपस्थित थिए । र, भोलिपल्ट सिधै मुख्यमन्त्रीले सामाजिक विकास मन्त्रालय फुटाएर मनाङ्गेलाई युवा तथा खेलकुद मन्त्रालयको जिम्मेवारी सुम्पेका छन् । भर्खरै पद तथा गोपनीयताको सपथ लिएका मनाङ्गे अपराधिक पृष्ठभूमिका पात्र हुन् ।

सत्ता जोगाउन मुख्यमन्त्री गुरुङले मनाङ्गेको वैशाखीको सहारा लिएका छन् । हेरौं, मुख्यमन्त्री गुरुङको यो तिकडमले उनको सत्ता जोगिन्छ वा झन् विवादमा मुछिदैं जान्छन् त्यो समयले नै बताउनेछ ।