पोखरा । गण्डकी प्रदेशका प्रमुख अमिक शेरचन यतिबेला अटेरी र अपरिपक्क पात्रका रुपमा चित्रित भएका छन् । उनलाई मन लाग्दा मध्यरातमा प्रदेशसभा अधिवेशन अन्त्य गर्न आएको सिफारिश पनि सदर गर्ने र दिउँसो उनकै कार्यकक्षमा निवेदनसहित भेट्न पुगेकालाई ठाडै अस्विकार गर्ने घटनाले उनको छविमा आँच आएको हो ।

शान्त, भलाद्मी र परिपक्कको छवि बनाएका प्रदेश प्रमुख आजको घटनाले कच्चा र निहित स्वार्थमा फस्ने पात्रका रुपमा चित्रित भएका छन् । प्रदेश प्रमुख शेरचन आफैंले प्रदेशसभा अधिवेशन अन्त्य गरेपछि विशेष अधिवेशनको माग गर्दै पुगेका टोली समक्ष उभिने नैतिक बल उनमा हराएको हो ।

प्रदेश प्रमुख शेरचनले भेट्न अस्वीकार गरेपछि नेताहरुले प्रदेश प्रमुख कार्यालयका सचिव हरि बास्तोलालाई विशेष अधिवेशनको माग गर्दै पत्र बुझाएर फर्किएका थिए । पत्रमा गण्डकी प्रदेशका मुख्यमन्त्री पृथ्वीसुब्बा गुरुङविरुद्धको अविश्वास प्रस्तावमाथि छलफल गर्नका लागि विशेष अधिवेशन माग गरिएको छ ।

प्रदेशसभाका एक चौथाइ सांसदले विशेष अधिवेशन माग गर्दै निवेदन दिएमा प्रदेश प्रमुखले बैठकको मिति र समय तोक्नुपर्ने संवैधानिक व्यवस्था छ । संवैधानिक व्यवस्था अनुसार नै नेपाली कांग्रेस, माओवादी केन्द्र र जनता समाजवादी पार्टीका नेताहरुले सो मागपत्र बुझाएका हुन् ।